Ouministeli wounamapya onghela owa li wa ka yandja eedjapo kovanhu va fika 29 moshitukulwa shaKavango East ovo va li tave lihongele ounamapya okupitila moshinyangadalwa shoToT Training.
Omukulunhu wouministeli Ndiyakupi Nghituwamata okwa ti ova deulwa otava ka ya momikunda nomeenhele da yooloka moshitukulwa, opo va ka deule ovanafaalama moshitukulwa
“Vahapu vomuvo ovava nale va dja hava landifa oihape noingumutulu omanga vamwe ve lipyakidila nounafaalama woimuna yavo,” Nghituwamata ta ti.
Okwa twikila yoo kutya ovahongi ava opo va mono eedjapo vati, okwa teelela va ka kale tava endifapo ovanafaalama moshitukulwa, nghee ve na okulongifa oinima yopashinanena, oshoyo yopaungoba ngeenge tashi ya poshikondo shounafaalama.
Nghituwamata okwa ti ovanafaalama vahapu moshilongo ovava ashike ve na omangeshefelo opedu, nohava kala alushe va tala nove lineekela omeva odula opo va dule okulya.
Okwa twikila kutya luhapu vamwe ohave lihaluka tava likola lela oilikolomwa inini okudilila momapya molwonghalo yomhepo, ehongo lounafaalama li li xwepo nanghee ve na okulonga nounamapya naikwao ya wedwa po.
“Onda hala ava va deulwa nena va tameke oshilonga shokudeula ovanafaalama ava nghee ve na okulonga, nokufinda eenghalo domhepo edi hadi kala di li omhinge noilikolomwa yomomapya avo, pamwe tava i komesho,” Ngituwamata ta yelifa.