Ovakalimo vamwe vomomukunda Eeshoke popepi nOshikango otaku hokololwa va fudula nokulya po ongobe oyo ya li ya fudikwa molwaashi ya fya komukifi wombulwa. 

Oshiningwanima eshi osha ningwa mexuliloshivike. 

Otaku hokololwa kutya ovakwashiwana ova ka fudulula mo ongobe ndele tava li ombelela nonande va kunghililwa kutya oshinima osho tava ningi osha nyika oshiponga. Koitukulwa ya yooloka moshilongo okwa lopotwa omukifi wombulwa tau dipaa eengobe unene. 

Oovene veengobe kave udite ombili shaashi oimuna yavo otai kwatwa komukifi wombulwa, notai fi inai liwa – hano ombelela yayo tai hepa. 

Omundokotola woimuna Dr Magano Kefas ta longele mouministeli wounamapya koshitukulwa shaHangwena okwa kumaida oshiwana opo shi xulife po okulya oimuna ya fya komukifi. 

Dr Kephas okwa ti omukifi wombulwa  owa nyika oshiponga molwaashi otau dulu okudipaa ovanhu. 

“Oimuna ya nyika onghundi nai lopotwe keembelewa dounamapya di li mEenhana opo i dule okupangwa,” ta ti. 

Okwa ti ombelewa yavo younamapya ohai ningile ovafaalama oyoongalele nelalakano lokuyandja ouyelele nehongo kombinga yomukifi. 

“Oshiwnaa nashi topolelafane ouyelele kombinga yomikifi doimuna,” ta ti. 

-fhamalwa@nepc.com.na