Auleria Wakudumo
Oongudu inene yovakwashiwana vomOngwediva oya holola eudonai eshi omalishangifo oshimaliwa shoshikukuta oo kwa li e na okutameka onghela a undulilwa komesho oikando ivali paife.
Ovakwashiwana ovo vamwe tava ti ova nangala pombelewa youkashikekookanhu, ekandulepo londjala nonghalonawa va teelela ku she opo va dule okulishangifa.
Ngoloneya woshitukulwa shaShana Elia Irimali, oo a li a holoka pengungo olo okwa kwashilipaleka kutya omalishangifo otaa tameke okudja mEtitatu.
“Keshe omukwashiwana ehe shi womOngwediva na shune ashike kodoolopa yavo a teelele efiku lavo shaashi ngaho ota mane po efimbo lOvangwediva,” Irimali ta ti.
Irimali okwa kwashilipaleka yoo kutya keshe ou ha nyangadala kutya iha longo mepangelo itaka pewa oshimaliwa shoshikukuta shaashi vati sho osha nuninwa ashike ovanhu ava ihava nyangadala voo ihava mono oyuuyemo yasha.
Omupopiliko wouministeli woukashikekookanhu, ekandulepo londjala nonghalonawa naye okwa kwashilipaleka kutya kakele kaavo ihava mono oyuuyemo, ovakwashiwana kutya ovakulupe, ovanhu ovo hava mono oshimaliwa shoulema, eefiye nakeshe ou ha mono ekwafo okudja kepangelo ita pewa ekwafo olo.
Oshimaliwa shoshikukuta osho tashi ifanwa “Conditional Basic Income Grant” oya pingafana po oikulya yoshikukuta oyo kwa li hai pewa omaumbo ihaa tema. Paife, ovakwashiwana itava pewa vali vati oikulya ndele otava pewa oshimaliwa, tashi tulwa koukalata vokulanda oikulya.
Omutumba wopashiwana okupitila mouministeli woukashikekookanhu, ekandulepo londjala nonghalonawa owa pitifa etokolo opo ovakwashiwana hava di medoolopa da yooloka odo kwa li inadi pewa nawa va kale hava mono oshimaliwa, okudja ngeno mulotete omwedi ou.
Omukulunhuwiliki wouministeli woukashikekookanhu, ekandulepo londjala nonghalonawa Ndiitah Nghipondoka-Robiati okwa holola ta ti okukwashilipaleka kutya oshimaliwa shoshikukuta osha fika keshe ou sha nuninwa, ovanambelewa okudja kombelewa youkashikekookanhu otava ka talela po omalelo edoolopa a yooloka, eedoolopa, nomikunda okudja 11 Novemba fiyo 21 Desemba.
Ovanambelewa otava ka kwashilipaleka omadina ovakwashiwana, okushangifa omadina ape, okushangifulula, nokuweda ouyelele waavo hava tambula nale oshimaliwa. “Eshi itashi kwashilipaleke kutya keshe eumbo ihali tema ile li na ovanhu ihava mono oyuuyemo ola kufwa ouyelele nokushangifwa op ova dule okumona ekwafo,” Robiati ta ti.
Robiati okwati mopaife oprogramma otai tale eedoolopa ngaashi Karasburg, Oranjemund, Ongwediva, Okahao, Oshikuku, Outjo, Oniipa, Omuthiya, Grootfontien, Okakarara, Otavi noHelao Nafidi okudja mo11 fiyo 23 Novemba neudo.
Omanga okudja vati mo 25 Novemba fiyo 25 Decemba, ouministeli youkwashikekookanhu tau ka hovela needoolopa ngaashi Swakopmund, Karibib, Mariental, Keetmashoop, Luderitz, Oshakati, Ondangwa, Outapi, Ruacana, Opuwo, Khorixas, Tsumeb, Oshivelo, Otjiwarongo, Okahandja, Eenhana, Nkurenkuru, Rundu, Gobabis noKatima Mulilo.
Natango oprograma otai ka talelapo omalelo opadoolopa mukunda ngaashi Gibeon, Gochas, Kalkrand, Stampriet, Maltahohe, Aroab, Koes, Tses, Berseba, Bethanien, Tsandi, Kamanjab, Okongo, Divundu, Leonardville, Otjinene, Witvlei noBukalo.
“Onghene ouministeli otau pula elongelo kumwe lomalelo aeshe eedoolopa novakufimbinga aveshe opo vakwafele ouministeli okukwashilipaleka kutya eyambidido eli ola pewa ovo veli momhumbwe noveli pumbwa shili,” Robiati ta ti.
Robiati okwa pula yoo ovakwashiwana va etelele omaufemba a pumbiwa okulishangifa ngaashi okamutwe koshilongo ka mwene weumbo oshoyo kovaneumbo aveshe (eecopy), ombaapila yolukalwa tai ulike apa hodi, ombapila yohombo ngeenge oyo omukwashiwana ta longifa, edjapo yedalo, okambaapila komafendelo amuni, naikwao ngeenge toka tambula oshimaliwa, ile to fiki peenghatu dimwe delishangifo.
Keshe omunhu kutya okwa tambulile nale oshimaliwa okwa teelelwa vati ekeli shangifulule opo a dule okupewa vali oshimaliwa olweefo la shikulako.