Festus Hamalwa
Ovanhu ve li 68, va dja koitukulwa ya yooloka yokonooli ova pewa eedjapo Omaandaxa opo va ninge oilyo yewilikongudu ledu. Oshiindingili eshi osha ningilwa mOshakati.
Moshiindingili eshi okwa li mu na minista wounamapya, omeva netululo ledu Calle Schlettwein novanambelewa va kula moninisteli nosho yo ngoloneya woshitukulwa Oshana Elia Ilimari.
Ava va pewa eedjapo ova dja moitukulwa ngaashi Oshana, Oshikoto, Omusati, noKunene. Ova holola ehafo linene eshi va mona oshinakuwanifa eshi sha fimnaa shokuninga oilyo ipe yewilikongudu ledu.
Ova ti otava ka longa noudiinini nokukwashipaleka kutya aishe otai ka tulwa peenhele nawa. Omusati owa dja ovanhu ve li 20, Oshana 13, Oshikoto 13 noKunene 22.
Minista wounamapya Schlettwein okwa twa oilyo yewilikongudu ledu omukumo opo va longe nelitulemo nokuyandja eyakulo koshiwana nokutula po elandulafano liwa koitukulwa yavo.
“Indeni mu ka yakule oshiwana, longeni nondjungu nokukala tamu longele kumwe nomalelo opamufyuululwakalo, otwa pumbwa okuyambula po eliko loshilongo shetu tashi pitile omukalo nghee edu tali longifwa,” Schlettwein ta ti.
Nonande omonisteli yaye ya taalela omashongo okwa ti oilyo ipe yewilikongudu nai va kwashipaleka kutya otai shi endifa nawa moilonga yavo nokukala ya mona omadeulo e na sha nghee ve na oku shi pondola moilonga yavo.
Minista okwa pandula aveshe ava va mona omhito opo ve shi pondole okuninga ewilikongudu ledu moitukulwa yokonooli.
Moshipopiwa shaye ngonoleya woshitukulwa shaShana Elia Irimari okwa ti edu ola fimana nola pumbwa okulongifwa pamukulo uwa opo epupi tali ya li shiive okumona ouwa wedu. Okwa pandula epangelo pamwe nouministeli wounamapya eshi tai twikile nokuyambidida ewilikongudu ledu koitukulwa yokonooli. Okwa ti eshi osho omukalo muwa nghee omatulululo edu taa kwafele okulundulula okukalamwenyo kovanhu.