Auleria Wakudumo
Elelo lodoolopa yaMuthiya ola kunghilila ovakalimo opo va xulife po okukakeka odoolopa
noimbodi.
Omupopiliko wodoolopa Martha Andreas okwa holola kutya ovakalimo vomOmuthiya ihava longifa omandoloma oimbodi oo a tulwa modoolopa kelelo.
“Otwa didilika kutya ovakwashiwana otava ekele ashike oimbodi mwa kwatelwa oitungifi oyo inava hala momapandaada,” Andreas ta ti ngaho.
Omupopiliko wodoolopa okwa holola yo kutya vamwe ohava ekele pomandoloma oimbodi ashike otava tula oimbodi pedu ponhele yokutula meni londoloma.
Andreas okwa londwela ovakwashiwana kutya okweekela oimbodi modoolopa inashi pitikwa. “Eekelo loimbodi modoolopa yaMuthiya ita li keli didimikilwa shaashi ohali monikifa odoolopa yakaka yo kaili vali pamufika wodoolopa,” Andreas ta kunghilile oshiwana ngaho.
Ka kele kekako, omupopiliko welelo lodoolopa yaMuthiya okwa holola kutya ekako ohali eta edimba lii olo luhapu hali eta oipuka. Ekako ohali tula yo eenghalamwenyo dovakalimo moshiponga shaashi ohali eta omikifi. Ovakwashiwana otava indilwa opo va ekele oikwatungifo peenhele odo da ufwa. Andreas okwa weda po kutya oimbodi aishe oyo hai di momaumbo nai tulwe momandoloma oimbodi oo a yandjwa kelelo lodoolopa.
“Okuekela oimbodi noitungifo oyo inamu hala vali momapandaanda, ponhele ya mbwalangadja keshe ile popepi momandoloma oimbodi inashi pitikwa,” Andreas ta holola ngaho.
Ovakalimo vomOmuthiya otava indilwa opo va fiile odoolopa yavo oshisho voovene opo i kale iyela, tai dulu yo okunana ovatalelipo vahapu nokukeelela omikifi odo hadi etwa kekako.
Andreas okwa ti elongelo kumwe pokati kelelo lodoolopa novakalimo ola pumbiwa opo ku findwe oumbodo wokweekela oimbodi modoolopa.
