Auleria Wakudumo
Ouministeli wehongo, oungoba, omaundano novanyasha otau kunghilile oshiwana opo shi likaleke kokule nouyelele wokupungula oshimaliwa tau tandavelifwa mokavidio koipupulu omo minista wehongo Sanet Steenkamp e li mo ta popi.
Ouministeli owa holola momukanda wa pitifwa komukulunhuwiliki mouministeli Mbumba Haitengela kutya owa didilika okavidio aka ke li kepandja hali ifanwa Future Finance News. Okavidio otaka indile oshiwana opo shi pungule oN$250.
Okavidio oka holola yo kutya oshimaliwa eshi omunhu ta ka pungula otashi ka indjipalekwa noN$2 000 keshe koshivike. Eshi vati oshi li omukalo wepangelo okuyandja omakwafo koshiwana tashi ningwa momukalo wokupungula oN$250.
“Ohatu shivifile oshiwana kutya ouyelele tau andjanekwa mokavidio omo kau shi woshili notau pukifa oshiwana. Epangelo nouministeli woovene ihau longifa omukalo wa tya ngaho, tau udaneke oshimaliwa keshe koshivike,” Haitengela ta fatululile oshiwana ngaho. Haitengela okwa fatulula kutya okavidio oka longifa efano laminista komalungula opo a kale a fa ta popi. Okwa ti ovaleli vahapu paife otava ningi oihakanwa youvidio voipupulu. Ovaleli va longelwa oshinima eshi, omwa kwatelwa Omuprima woshilongo Elijah Ngurare, Omupeduprima woshilongo Natangwe Ithete osho yo minista womauyelele Emma Theofelus.
Ovakwashiwana otava kunghililwa opo va kale oupafi nokukala va lungama opo vaha ninge oihakanwa yokukengelelwa.
Omukulunhuwiliki okwa indila yo oshiwana opo shiha tandavelife okavidio koipupulu.
Oshiwana otashi kunghililwa opo shi xulife po okuninga ouvidio voipupulu.
“Ouvidio va tya ngaha ova ningwa nelalakano okupukifa nokulila oshiwana,” Haitengela ta ti.
Oshiwana otashi indilwa opo shi landule omapandja eeministeli depangelo oo eli mondjila notaa yandje ouyelele uli mondjila.