Ovakwashiwana va dja moikandjohoololo ya yooloka moshitukulwa shaShikoto ova ninga omunyanyo wopambili tava pula va popilwe momhumbwe yomeva.
Oshiwana osha ninga omunyanyo Etitatu tashi pula ombelewa yangoloneya waShikoto i kandule po omukundu womeva moshitukulwa.
Omukanda-nyenyeto wavo owa pewa ngoloneya waShikoto Penda ya Ndakolo.
Omhumbwe yomeva oyo imwe i li eshongo linene la taalelwa koshiwana moikandjohoololo ngaashi Eengodi, Okankolo noshoyo Nehale lyaMpingana.
Nonande epangelo la ninga eenghendabala dokutunga eemboola domeva, oshiwana onghee ngaa tashi dengwa kenota.
Ovakwashiwana otava nyenyeta tava ti eemboola odo da tungwa kepangelo odi na omeva malula itaa dulu okunuwa kovanhu.
Omuhongifikola umwe ota nyenyeta ta ti ovanafikola novahongifikola ohava ka teka omeva komifima molwaashi omeva okwa pwa po peefikola.
“Omeva okwa pwa po peefikola molwaashi eeloli odo hadi twalwa eetenga domeva keefikola oda teka,” ta ti.
Onghee naashi osha eta opo eefikola di kale dihe na omeva.
Omuhongifikola ha longo ofikola moshikandjohoololo Nehale lyaMpingana okwa hokolola ota ti kashipu okuhonga pofikola pehe na omeva molwaashi ohava pumbwa omeva okunwa.
“Paife ohatu piti eengula dinene hatu ka teka omeva momifima molwaashi ngeenge ova ka teka kwa laata oto hange omeva a pwa ko,” ta hokolola.
Omuhongifikola umwe okwa omhumbwe yomeva keefikola otai eta ovahongifikola va ka longele keefikola dimwepo oku ku na omeva.
“Kape na omunhu a hala okuhonga mofikola muhe na omeva. Omeva okwa fimana efimbo keshe koilonga. Onghee otu li moupyakadi womeva kofikola yetu,” ta ti.
Eshi a kwatafana naKundana ngoloneya woshitukulwa shaShikoto, Penda ya Ndakolo okwa ti ombelewa yaye oya didilika omhumbwe yomeva mOshikoto, onghee okwa ti okwa shangela omukanda kombelewa yomupresidente u li kombinga yenota lomoshitukulwa.
“Onda ninga yoo vali ekwatafano naminista wounamapya omo a lombwela nge ta ti omhumbwe yomeva otai kandulwa po diva. Onda ninga yoo vali omutumba nomukulunhuwiliki wehangano lomeva loNamwater,” ngoloneya ta ti.
Okwa ti oshiwana na shi li didimike ashike kutya omhumbwe yomeva otai kandulwa po diva. fhamalwa@nepc.com.na