Auleria Wakudumo 

KHORIXAS – Omukulupe weedula 62 womolukanda Donkerhoek moKhorixas oo hadi meumbo la tungwa needalate da dja meembete da kulupa noitenda ya dja koikwakwa yeetuwa okwa ti ye oku li omudinwa molukanda lavo, omo ovakwashiwana hava longifa eumbo laye ongokandjuwo nonhele yoku ya moixulo. 

Ellie Nabeb oha di meumbo laye oye aeke, olo li li pokati kolukanda. Vati ngeenge a di mo meumbo laye a ka nyanga, oha hange meumbo laye mu na eenyata neekoondoma da longifwa tashi ulike kutya meumbo laye omo hamu longelwa oilonga oyo ya kaka.  

Nabeb ta ti ovakwashiwana inave mu valula a fa omunhu. Ta ti efimbo nefimbo oha kala e shi kutya oolye hava kala meumbo laye, ashike ke na eshi te va ningi shaashi ohe va tila. 

“Ohandi nangala nda tila mo meumbo, handi lipula ngeenge ohandi piti mo tuu moufiku. 

“Eumbo lange kali na sha meembuli, kali na oipeleki nopeenhele dihapu ope na eembululu shoo osho nee hashi eta ovakwashiwana va pite keshe apa va hala. Ame omo ashike handi di omu, kashi na nee kutya opokufu ile opefimbo lodula,” Nabeb ta ti.

Nonande Nabeb oku li meedula dokukwata opendjela, okwa ti opeendjela kuye ohe i udu ashike kuvakwao. Nabeb okwa ti okwa imbwa okukwata opendjela shaashi ke na eembapila doufemba woshilongo.

“Onda li ndi na odjapo yedalo, ashike omumwamemekadona umwe okwa ekelashi odjapo yange yedalo,” Nabeb ta ti. 

Nghene ondjapo yaye yedalo ya kupulwashi, okwa ti okwa kala e na oudjuu okuya kombelewa yoikwameni nomataulikilo okeengaba opo a mone odjapo imwe. 

Mombelewa yoikwameni okwa ti vati okwa konga ekwafo luhapu, ashike inave mu kwafela.

Okwa ti okudja odjapo yaye eshi ya kana, okwa kanifa yoo oilonga yaye. Nabeb okwa ti okwa li ha longo keefaalama novanghona vaye vati ove mu taata shaashi vati ke na oufemba. 

“Oilonga yange eshi ya kana, oluhepo nalo ola kala tali ehene nge fiyo omonghalo omo ndi li paife,” Nabeb ta ti. Paife Nabeb oku li moluhepo lidjuu nosha ninga shidjuu okukonga oilonga keefaalama shaashi ke na oufemba. 

Nabeb okwa ti Kalunga okwe mu yambeka nomapando ovakwanambwiyu avali, ashike puye ihava ende po. 

“Nonande kave na oilonga i pondola shaashi vati navo ohava longo meefaalama, kave shi ngeenge ondi li momwenyo,” Nabeb ta popi ta popoloka omahodi.

Ngoloneya waKunene, Marius Sheya okwa ti ka li a lopotelwa onghalo yaNabeb ashike paife oku na oku mu kwafela. Ondi na oku mu pa ekwafo kutya otashi pula shike. Nande onda longifa oyuuyemo yange mwene peemhito dimwe,” Sheya ta ti.  

-wakudumoauleria@gmail.com