Ovanhu 25 mwa kwatelwa ovanyasha novakulupe ova pewa omadeulo okuhonga oiuma nelalakano lokumona ounongo noku ka tota eengeshefa davo.
Omadeulo okwa ningwa oule womafiku ahamano komukunda Ongula yaNetanga koshitukulwa shaHangwena.
Omadeulo aa okwa yambididwa noshimaliwa sha dja kehangano loNational Arts Council li li koshi yoministeli wehongo.
Omadeulo okwa unganekwa kuKleopas Nghikefelwa pamwe naJakobina Ngula nove na ounongo wokulonga oiuma noukopi.
Nghifekelwa okwa ti otava lalakanene okukala va xwaxwameka oshiwana okulongifa ounongo wavo tashi pitile mokuhonga oiuma.
“Otwa didilika ovanhu vahapu ve na ounongo ashike kave na ouyelele kutya otava ka longa peni,” ta ti.
Okwa ti ovanhu va pewa omadeulo otave ke lilongela vene nosho yo okueta po eemhito doilonga momidingonoko davo.
“Omadeulo okwa yandjwa kovanhu va dja koitukulwa ya yooloka. Otu na omukumo wokuninga omadeulo lwoikando ya yooloka shaashi oshiwana oshi na ohokwe yokudeulwa,” ta ti.
Okwa kumaida ovanyasha opo va kale tava kufa ombinga momadeulo a yooloka molwaashi otashi va pe omhito okumona ounongo.
“Ohandi indile epangelo opo li yambidide eepolongalama dokudeula ovanhu momikunda molwaashi osha fimana,” ta ti.