Auleria Wakudumo
Ongwediva – Elelodoolopa yaNgwediva melongelokumwe nouministeli wehongo koshikondo shoLife Long Learning owa yandja omadeulo okunduluka ofewa yokuwapaleka hai ifanwa oPine Gel kovakwashiwana vehe na oilonga mOngwediva.
Omupopiliko wodoolopa, Ottilie Shingenge okwa holola ta ti eshi osha ningwa okushakeneka epangelo ondjilakati, nokukwafela ovakwashiwana okukala tava dulu okulikongela oyuuyemo kuvo vene.
“Elalakano okuxwepopaleka okuhe na oilonga moshitukulwa shetu unene movanyasha ovo opo va fiye po ofikola novakwashiwana momudingonoko,” Shingenge ta ti.
Shingenge okwa weda po ta ti okuyandja omadeulo okunduluka ofewa yoPine Gel otaku yandje nokuweda ko kounongo wokuuya po nomikalo da yooloka okunduluka eefewa da wedwa po.
“Omadeulo okunduluka ofewa ei okwa nuninwa okuyandja owino kovakwashiwana vehe na oilonga. Konima yomadeulo, otwa teelela ovakwashiwana ve uye po neeproyeka davo dokunduluka eefewa nokukala have lilongele kuvo vene. Eshi otashi kwafele okushakeneka epangelo ondjilakati ngaashi la ninga eindilo kovakwashiwana,” Shingenge ta ti.
Omadeulo okwa tameka mo24 Febuluali 2025. Mopaife, otaa ningilwa ovakwashiwana ava ve li modoolopa yaNgwediva pongeleka yoGloria Day. Omadeulo otaa ka kala yo poSky Phase 1 osho yo Ongwediva ikulu.
Omunambelewa koshikondo shoLife Long Learning mOshana, Regina Mwanyangapo okwa holola ta ti omadeulo okwa nuninwa ava vehe na oilonga shaashi ova hala okuyandja owino kuvo opo va dule okulilongela kuvo vene.
“Omadeulo otaa yandjwa oshali kovakwashiwana ashike otava ka landa ngaho oPine Gel oyo ya ndulukwa momadeulo avo opo tu dule okulanda oipumbiwa oyo hatu ka longifa molufo la landula ko. Itatu yandje ashike omadeulo ponhele apa, ashike ohatu ka enda neenhele da yooloka,” Mwanyangapo ta ti.
-wakudumoauleria@gmail.com