Auleria Wakudumo
Ouministeli womauyelele nomakwatafano opaungoba otau pula Ovanamibia opo va yandje oinyangadalwa noyeetwapo yomahekeleko oyo kwa li va longekida pefimbo lefyo lOmukokolipresidente Sam Nujoma.
Oinyangadalwa ile oyeetwapo oya kwatela mo omafano, omaimbilo, omatumwalaka omahekeleko nakeshe shimwe osho tashi dulu okuyandjwa koshiwana.
Minista womauyelele Emma Theofelus okwa holola ta ti oinyangadalwa noyeetwapo yOvanamibia otai ka longifwa kovakwanedimo vOmukokolipresidente osho yo okutulwa nonhele yomhungulilo yondjokonona yaNamibia, National Archives of Namibia.
Oinyangadalwa noiyetwapo otai tumwa koemail yo foundingfather@mict.gov.na.
Theofelus okwa ninga eindilo eli pefimbo ta holola kutya efimbo lokudimbuluka Omukokolipresidente olo la li la yandjwa kepangelo, ola xula Omaandaxa momafiku 03 Maalitsa 2025.
“Oule wefimbo olo la li la tulwa po kepangelo okwa li okuyandja olupandu, etumbaleko nokutwala olutu laye laxuuninwa moshilongo ashike,” Theofelus ta ti.
Theofelus okwa weda po ta ti Omupresidente Nangolo Mbumba okwa yandja olupandu kOvanamibia eshi va holola oukwawananghali pefimbo lefyo laNujoma.
“Ohatu pandula ovaleli vopaitopolwa osho yo ovaleli vopamufyuululwakalo ovo va kwashilipaleka kutya omudimba wOmukokolipresidente owa fika koitopolwa aishe noshiwana osha yandja etumbaleko lasho laxuuninwa kuNujoma,” Thoefelus ta ti.
Theofelus okwa ti epangelo otali pandula yo ovakwanedimo vaNujoma eshi va pitika epangelo li ninge omatokolo okupaka Omukokolipresidente koHeroes Acre mOvenduka.
Theofelus ota indile Ovanamibia va twikile okutumbaleka Nujoma molwoilonga oyo a longa mondjokonona nexumokomesho lemanguluko loshilongo.