Auleria Wakudumo
Omhangulilo tai longo noshikumhungu sheedalate da hanaunwa po kovanahambo kOkashana kUukongo waNehale Omaadaxa oya londwela ovanahambo va xulife po okuhanauna eedalate konhele oko, manga oshibofa tashi talwa noku konaakonwa moule.
Ovanahambo ava veli 16 ova kwatelwe po kuyele omwedi ou. Omaandaha oshivike shadja ko, keshe umwe okwa li a pewa elifutile mo noN$3 000 komhangu moTsumeb.
Oshibofa shavo osha undulilwa yoo komesho 12 Decemba. Eedalate vati odoohandimwe vehe shiivike kovanahambo novakwashiwana vopomudingonoko.
Ava ova taalela oibofa ngaashi okuhanauna po omaliko nokulonga ouxwapindi moshiwana.
Nande ongaho, ovanahambo ovati itava shuna omutwe moipeta.
“Omanga oshibofa tashi konakonwa, ita tu dulu okukufa onghatu ya landulako,” ovanahambo tava ti.
Ovati vati ovanyolela nokutuma omapulo kovanhu ashike kapena ou vati evapa enyamukulo.
Omunashipundi nomukwateli komesho wovanahambo Kristian Indongo okwati etokolo lokuhanauna po eedalate ola etwa eshi inava mona enyamukulo okudja kombelewa yaNgoloneya waShikoto Penda Ya Ndakolo.
Ovanahambo ova li va unganeka omunyanyo wopambili 5 Septemba nokwa li va pula va nyamukulwe nongeenge hasho otave ke likufila oveta voo vene ndele tava hanauna po eedalate dovanamaliko vati.
Ovanahambo ovati paife vati oimuna yavo ohai kanwa nokukalya kokule popepi nEtosha.
“Inatu hala okukalifa popepi nEtosha shaashi okukule, fye otwa tila oinamwenyo yetu i like poi le tu monifwe nande oshiponga manga hatu tonatele oinamwenyo yetu,” ovanahambo tava ti.