Ovanhu ve na oulema hava pangele eembasikela ova yambididwa eshi va pewa oilongifo yokupangelifa kehangano loTuyapeni Etine mOshakati.
Oilongifo ya yandjwa oili pongushu yoshimaliwa N$8820.
Ovanhu va yambididwa ohava pangele eembasikela pehangano loDEEP (Disability Economic Empowerment Project) lili molukanda Oneshila mOshakati.
DEEP okwa totwa momudo 2007 nelalakano lokuyandja eemhito doilonga kovanhu ve na oulema noshoyo okuyandja omadeulo kovanhu ve na oulema ovo ve na ohokwe yokupangela eembasikela.
Ponhele opo oha pa longo ovanhu vatano kumwe mwakwatelwa omukainhu umwe, noha pangelwa omaludi eembasikela da yooloka.
Moshipopiwa shaye pefimbo ta yandje oikwafifo omukulunhu wehangano loTuyapeni Phillip Mbangula okwa ti ehangano lavo ota li lalakanene okushakeneka epangelo ondjilakati noshoyo okukala la yambidida ovanhu ve na oulema ovo va talela omashongo.
Mbangula okwa kala shito noku eta po eembasikela dounona vaye dipangelwe ponhele opo ashike okwa kala a didilikwa omashongo a telelwa kovanhu hava longo opo.
Onghee okwa ti naashi oshe eta opo a landele ovanailonga ovo oikwafifo yokukala tava longifa ngeenge tava pangele eembasikela.
“Oilongifo ei otai ka eta po elunduluko lakula shaashi paife
ovanhu ava otava kala tava longo
noupu. Onghee naashi otashi va tu omukumo opo va twikile okulonga nondjungu nokukala tava pangele eembasikela dihapu mefiku,” Mbangula ta ti.
Okwa weda po ta ti epangelo ita li dulu okukondjifa ondjala noluhepo olo alike onghee osha fimana ngeenge ovanhu tava shakeneke epangelo ondjilakati tashi pitile mokuyambidida ovanhu ve na ouyuuyemo i li
pedu.
Pefimbo ta tambula ko omakwafo, omukulunhuwiliki wehangano loDEEP Moses Tolata okwa ti ova pandula unene eshi va pewa oikwafifo shaashi itava kala vali tava longo noudjuu.
“Paife ohatu kala a tu pangele eembasikela dihapu shaashi otwa pewa oikwafifo ya wana okukala a tu longifa okupangela eembasikela dovakwashiwana. Onghee eshi otashi tu tu omukomo opo tu kale a tu longo nelitulemo,” Tolata ta ti.
Tolata okwa ti otava twikile nokuyandja omayakulo mawa kovakwashiwana tava ka eta eembasikela davo di pangelwe.
Okwa weda ta ti ova talela eshongo linene lookalyamupombo hava kala tava ke po oilongifo yavo efimbo loufiku.
“Otwa pumbwa omukeleli womaliko opo a kale ta tonatele onhele yetu efimbo loufiku shaashi paife otwa kwatwa koumbada kutya oilongifo yetu ei twa pewa otai ka vakwa po nayo,” ta ti.