Omukulunhu wopolifi moshitukulwa shaMusati Commissioner Ismael Basson okwa kumaida ovadali opo va tonatele ounona molwaashi paife ova ninga oihakanwa yokukwatwa onghonga kovapambele vavo. 

Okwa weda po ta ti ovanafikola ova ninga oihakanwa yokukwatwa onghonga kovashiinda ngeenge tava di kofikola. 

Basson okwa ti moshitukulwa shaye ohamu lopotwa oibofa ihapu omo ounona va ninga oikahanwa yokukwatwa onghonga. 

Omaandaxa moshitukulwa shaMusati momukunda Onkani okwa lopotwa okaana keedula 12 vati ka kwatwa onghonga komulumenhu weedula 25 womushiinda shavo. Oshiningwanima osha ningwa efimbo lomutenya konima eshi nakuninga oshihakanwa a hangika ashike opo a di kofikola. Otaku hokololwa kutya omufekelwa okwa nukila okaana ndele te ka longele omunyonena wopaixulo. 

Nakuninga oshihakanwa okwa lopotela ina fiyo omufekelwa ta kwatwa po. 

Ota holoka momhangu nena nota pangulilwa oshibofa shekwatonghonga. 

Omakonakono opolifi otaa twikile moshikumungu eshi. 

Okwadidilikwa oibofa yomakwatonghonga hai lopotwa kwa laata, osho omafimbo amwe hashi eta opolifi i ninge omakonakono noudjuu. 

Oshiwana osha kumaidwa opo alushe shi lopote oibofa yomakwatonghonga pefimbo osho yo oibofa yomahepeko omomaumbo. 

-fhamalwa@nepc.com.na