Auleria Wakudumo
Ovanadolongo vahamano vomovanadolongo 11 ovo va lopotwa ve livaka modolongo kOmuthiya moshitukulwa shaShikoto okupendukila Olomakaya eshi va longifa oitenda nokulivaka mo modolongo inava monika. Opolifi oi li mokashoko ovalumenhu Ovanamibia vatatu oshoyo Ovaangola vatatu. Ovalumenhu ve liwe mokashoko ovo Tega Tuyakula Thomas Absalom Kiiga omukwashiwana waNamibia weedula 30, Wilhelm Sheehama George Kakuva omukwashiwana waNamibia weedula 30, Immanuel Paulo omukwashiwana waAngola weedula 20, Nambweya Petrus Nande omukwashiwana waNamibia weedula 20, Joromisius Tumuna Vatileni omukwashiwana waAngola weedula 20 naSimon Junior Iyambo omukwashiwana waAngola weedula 21.
Omupopiliko wopolifi, Omupedukomufala, Kauna Shikwambi okwa koleka oshiningwanima eshi. Shikwambi okwa ti oshiningwanima osha ningwa pokati kotundi 04h04 keengulasha. Otaku hokololwa ovafekelwa aveshe ovalumenhu vati va mbonyona ekuma lodolongo va longifa oitenda nokulivaka mo.
“Aanambelewa vopolifi ve uya moilonga po06h00 yongula ovo va li tava ningi omapekaapeko nove litwa eedopi da wa po nombululu. Eshi va ka talela okudja meni lokakuma, ova mona kutya ombululu oya dilila mokandjuwo kokakuma 6,” Shikwambi ta ti.
Ovafekelwa ve livaka modolongo ova mangwa molwominyonenwa dihapu ngaashi oumbudi, eteyo lomaumbo, okatoo, ekwatonghonga, oukengeleledi, ehepeko lovanambelewa vopolifi, va kwatwa noingangamifi, okunyeka kwa homatiwa, nonghedabala yedipao.
Ovafekelwa ovo va kwatululwa omukwashiwana Omunamibia umwe novakwashiwana Ovangola vanhe. Hernanio Linyoteni Wafinguila Joao omukwashiwana waAngola weedula 20, Thomas Jeronimu Mpinge omukwashiwana waAngola weedula 28, Annel Shimbobela Omunamibia weedula 29, Vatileni Nghitotonanye Amutenya omukwashiwana waAngola weedula 20, Hangula Kapembe Mashete omukwashiwana waAngola weedula 29.