Mexuliloshivike omwa lopotwa ovanhu vahamano ve likufa eemwenyo nomulumenhu umwe weedula 22 kwa li ta kendabala oku li kufa omwenyo konima eshi a nwa oudio.
Ovanhu ve likufa eemwenyo ovalumenhu vatano noshoyo omukainhu weedula 49 Mangundu Kristine Nepemba omukalimo wokoNkurenkuru.
Omupopiliko wopolifi omupedu Commissioner Kauna Shikwambi okwa hokolola ta ti okamatyona keedula 13, Mekondjo Katundu oke limangeleka moWindhoek shaashi vati ka hangika kovadali vako taka tale ouvidio va nyika oupaani.
Okudja opo vati ina okwa lombwela xe kutya oha tale ouvidio va nyika oupaani.
Katundu okwe li uwa e li meemhango mokombifa meumbo lavo.
Omulumenhu womukulupe weedula 67, Lazarus Hadipo okwe lituwa kovaneumbo vaye e li meemhango monduda yaye yokunangala koWalvis Bay.
Omulumenhu weedula 24, Hareb-Hafeni Kalumbu okwe lituwa e li meemhango monduda yaye yokunangala mOngwediva.
Omulumenhu weedula 25, Oloho Julius Vathila okwe lituwa e li meemhango monduda yaye yokunangala kovaneumbo vaye.
Lopokati opo, omulumenhu oo kwa li e li modolongo Ekandjo Festus Kalo okwa xulifa konima eshi a nwa omiti dihapu.
Oshiningwanima osha ningwa pefimbo kwa li ovanambelewa vopolifi tava yandje omiti kovanadolongo koshitaashi shopolifi yaShikuku.
Opolifi oya hokolola tai ti Kalo okwa kufa po omiti daye adishe ndele te di nu po oshita.
Okudja opo okwa twalwa koshipangelo shaShikuku nokonima okwa xulifa mefiku la landula ko.
Opolifi oya hokolola tai ti Kalo okwa li e na oshibofa shonghendabala yekwatonghonga.
Omwedi ou, ouministeli wouhaku, onghalonawa nomayakulo opashiwana okwa li wa ninga oikonga yokudimbuluka efiku lokulimangeleka omo kwa li oshiwana tashi pewa ouyelele nghene shi na okulikelela okulimangeleka.
Oshivike sha dja ko natango ouministeli wouhaku okwa li wa dimbuluka efimbo loudu wopamadilaadilo mOshakati omo ovaxungimwenyo neendokotola tava yandje ehongo nouyelele koshiwana.
Omakonakono opolifi otaa twikile moibofa aishe yomalikufo eemwenyo.