EENGODI – Kansela woshikandjohoololo shEengodi Protasius Neshuku ota hokolola ta ti oshiwana onghee ngaa tashi twikile nokudengwa kenota omanga ovanhu vamwe ohava ende oshinano shile tava ka konga omeva komifima.
Kansela okwa ti nonande epangelo la ninga eenghendabala dokutungila ovakwashiwana eemboola domeva inashi kwafela molwaashi eemboola odi na omeva malula.
Okwa didilikwa oikandjohoololo ngaashi Okankolo naNehale lyaMpingana moshitukulwa shaShikoto nayo ya taalela omhumbwe yomeva noshoyo onghalo yeendjila dii nomakwatafano a-MTC.
Omhumbwe yomeva oya kumwa yoo vali eefikola noupangelo ashike ouministeli wounamapya, omeva nedu ohai ningi eenghendabala dokutwala eetenga domeva peefikola noupangelo.
Neshuku okwa lombwela Kundana ta ti ovakwashiwana ohava xupu ashike mokuteka omeva momifima nomeendungu.
“Ovanhu ohava pitile eengula komatambi omeva tave ke li ha kana opo vaha hange omeva a pwamo,” kansela ta ti.
Okwa ti ovakulupe vehe na ovayambididi momaumbo ova ninga oihakanwa yokudengwa kenota molwaashi ihava dulu okufika komifima di li kokule.
“Oshiwana oshi na omhito yokukwatwa komikifi hadi etwa kekako shaashi ohashi nu omeva a kaka e na ongwiwi. Ovadali ohava ningi eenghendala dokundjenekela ounona wavo omeva okunwa,”ta holola.
Omwedi wa dja ko minista wounamapya, omeva netalululo lomadu Calle Schlettwein okwa ti oministeli yaye oya longekida oshimiliwa eemiliona N$15 okulongifwa okutunga eemboola domeva moitukulwa yomonooli.
Minista edi okwe di popya pefimbo kwa li ta patulula omboola yomeva moshikandjohoololo shaKahao, omo a popya ta ti epangelo otali lalakanene okukandula po omukundu womeva momikunda. fhamalwa@nepc.com.na