Oibofa yovanhu tava kondjele noku li dengela eenhele domadu ya hanya melelo laOukwanyama noshoyo oumbudi woimuna.
Edi oda popiwa kelenga la kula loshikandjo Eudaneko, tatekulu Gorge Nelulu efimbo lovahamba yaUkwanyama ya talela po oshikandjo shaye mexuliloshivike. Nelulu okwa ti moshikandjo shaye osho shimwe shina ovanhu hava kala tava kondjele omadu noku li denga unene tuu ovanhu vapambafana. “Alushe kombelewa yange oha kukala kuha di ovanhu ve ya okulopota ngeenge tava kondjele omadu omanga vamwe ohava kala va dengwa. Ovanhu vamwe ohava kala ovamwainafana ashike otave li dengele omaumbo ovakulunhu vavo ovo va xula ko nale,” Nelulu ta ti. Okwa weda po ta ti unene tuu ngeenge mwene weumbo a xulifa oha shi eta eenamanana pokati kovapambele. Moshipopiwa shaye Nelulu okwa pula ohamba yaUkwanyama mekulu Marta Mwadinomho Kristian Nelumbu opo i kale ya kwatafana neembelewa douministeli womadu kombinga nghene oshikumungu shovanhu tava kondjele omadu shi na okukala sha kandulwa po mOukwanyama. Nelulu okwa weda po yoo vali ta ti moshikandjo shaye omu na ovanhu ve li ninga ookalyamupombo voku vaka po oimuna yovanhu mwa kwatelwa eendongi tadi dipawo. Nelulu okwa lombwela yoo vali ohamba ta ti oshiwana shomoshikandjo shaye ohashi patulula eendingosho eengula dinene omanga vamwe oha pate eendingosho davo kwa laata, osho oshi li kondje yoveta yaUkwanyama. Okwa ti eengeleka doiveva otadi pukifa oshiwana unene tuu ovanafikola. Mekulu ohamba Nelumbu oye li pyakidila noku talela po oikandjo yopamufyuululwakalo aishe melelo laUkwanyama opo a kundafane noshiwana kombinga yomahepekafano omomaumbo noshoyo oikumungu yomakwatonghonga.
Nelumbu okwa talela po nale oshikandjo Ohaingu noshikandjo Weyulu Hedimbi onghee paife ota ka talela po oshikandjo Oshikunde.
Moshipopiwa shaye ohamba Nelumbu okwa ti okwa kumwifwa koimbuluma tai longwa moshitunda shaUkwanyama unene ovanhu tava dipayafana, ounona tava kwatwa onghonga noshoyo ovanhu vehe na ombili.
Okwa kumaida oshiwana opo shi kale shina ombili nelongelokumwe novaleli vavo vopamufyuululwakalo.
“Oshiwana xulifei po okukondjela omadu. Ovanhu nava kale tava lopotele oovene vomikunda davo ngeenge ve na omaupyakadi kombinga yomadu,” ta ti.
Okwa weda po ta ti ngeenge mwene womukunda ina hala okukwafela oshiwana kombinga yeenamanana domadu, oshiwana na shikwatafane nombelewa yelenga mwene woshikandjo, ndele haku li denga.
“Onda hala melelo laUkwanyama mu kale ombili. Ohandi udu nai ngeenge ovanhu vehe na ombili, onghee xulifei po okuudifa nge nai,” ohamba Nelumbu tai ti.
fhamalwa@nepc.com.na