ONGWEDIVA – Vahapu otava hokolola meekulu Justina Haihambo a li omuprofeti woshili omolwomaxunganeko mahapu a popya a ningwa shili.
WaHaihambo ngaashi a li ha ifanwa kuvahapu, okwa dalewa koAngola ashike pefimbo e na omido 12 okwa tembukila komukunda Okadiva moshitukulwa shaHangwena.
Okudja opo okwa fukala meengoma ndele ta mono omushamane waye. Ashike pefimbo e na okaana konghelo opo a mona emoniko laye lotete nokufiya po omushamane waye ndele ta tameke okukala omuprofeti.
Wahaihambo omukalimo wokomukunda Onankali moshitukulwa shaShikoto okwa xulifila Etivali meumbo laye efimbo lomutenya.
Okwa li e na omido 98, nokwa fiya po ounona vavali vovalumenhu. Omushamane waye okwa xulifa nale.
Etameko lomaxunganeko
Okukala po komuprofeti ou, okwa kala ku na vahapu ve mu itavela, omanga vamwe va kala noku mu sheka tava ti omunaipupulu.
Omonamati Joseph Nghidipo weedula 60 okwa hokolola ta ti ina okwa li omutumwa waKalunga woshili oo a tameka oshilonga shaye shouprofeti manga a li peedula dounyasha.
Okudja eshi a pewa emoniko laye lotete, omuprofeti ou vati okwa tameka okuya komaongalo a ka popye eshi a lombwelwa kuKalunga. Vati petameko okwa li she mu djuupalela shaashi vahapu kava li ve mu tambula ko, shike omido eshi tadi i do tadi uya, ye ta yandje omaxunganeko taa ningi oshili, ongeleka unene yaElcin oya tameka oku mu tambula ko.
Nghidipo okwa yelifa ta ti petameko eshi ina a tameka oshilonga shouxunganeki okwa li a ngabekwa komaongalo a yooloka.
“Okwa li hava ula meme tava ti oha popi oipupulu,” ta ti.
Okwa ti ina kakwa li ta pukifa oshiwana ashike okwa li ta longo oshilonga osho a pewa kuKalunga.
Nghidipo okwa ti ina okwa li omutekuli molwaashi keumbo laye oku na ounona e va tekula.
Okwa weda po ta ti ovanhu vamwe ovo va tekulwa kuina paife ova hombola ile va hombolwa va ninga omapata avo meumbo tuu omo.
“Meme kakwa li e na okatongo. Okwa li e hole ombili nelandulafano,” ta ti.
Omuprofeti ou vati okwa ka dika eumbo kOnankali, ta ti okwa lombwelwa kuKalunga e li luke ‘Eumbo laKalunga’.
Ovanhu va dja oshilongo ashishe ova ka tameka okumbobolokela keumbo oko, tava yungu eenhanda, navahapu ova tunga ko eenduda dopaumwene.
Nghidipo ta ti meumbo omwa tungwa eenduda di dulife 70 kovanhu va dja komaongalo a yooloka.
Ovanhu vamwe ova fiya po omaumbo avo, va tembukila filufilu keumbo laWahaihambo oko va dika omapata avo. Vati okwa li a lombwelwa kuKalunga kutya otaku ka wa onyofi, tai ka eta oupyakadi, novanhu vahapu otava ka lotoka va yuka kEumbo olo laKalunga oko va ka hondame.
Eshi osha eta opo vamwe vomovalanduli vaye va tunge eenduda dokunangala va ningila ewo lonyofi eshi tali ya. Vahapu ohava ka nangala meenduda davo omo ngeenge va ka talela po omuxunganeki.
Ovalanduli vaye onghee va teelela onyofi i kale ya wa meulu ngaashi naana kwa li sha popiwa komuprofeti.
Konima yomido ovanhu okwa li hava djala oungodi va tilyaana poikesho molwaashi vati onyofi otai ka wa meulu.
Nghidipo okwa popya kombinga yeenduda odo da tungwa meumbo, ta ti otashi di kehalo lomunhu ou a hala okukufa ko onduda yaye.
“Eumbo otali twikile okukala laKalunga okudimbuluka meme. Otali ka kala eumbo la fimana mondjokonona yokuyandja efimaneko kumeme,” ta ti.
Okwa ti paife ngaha ovanhu ova djala oikutu itoka meefya shaashi omuprofeti okwa li ha djala oikutu itoka efimbo keshe.
Okwa hokolola ta ti ina kongeleka okwe lixula ko konima yeedula hamano da pita, okwa kala iha fiki vali omolwoukulupe.
Omauxunganeko a ninga oshili
“Meme ka li ha popi oipupulu. Omaxunganeko ayeshe oo a popya okwa ningwa shili,” Nghidipo ta ti.
Amwe omomaxunganeko a tofwa mo kuNghidipo ongaashi:
Ealuko lOvanamibia ovo va li va faduka po oita. Vati okwa popya ta ti ovanhu ve li kondje yoshilongo pefimbo loita otava a lukile koNamibia. Vati okwa popya ta ti oita otai xulu ndele eembulu tadi shuna.
Okwa xunganeka omukifi wo-HIV\AIDS oo tau ke ya moshilongo. Nopeedula edi okwa xunganeka etukuko lomukifi woCovid-19.
Oukriste
Omufitaongalo wongeleka Onankali Elcin Asser Shivute, okwa ti Wahaihambo okwa kala oshilyo sheongola laNankali.
Okwa li omukriste woshili. Vati alushe ha lombwele eongalo opo li twikile okwiilikana lihe na edimbuko.
Shivute okwa ti nononande Wahaihambo ha kala ha ningilwa elongelokalunga keumbo, okwa kala alushe ha futu oiyandjwa yaye yokomudo yongeleka.
“Ovaneumbo vaye alushe ohava fikifa omakundo taa di kumuprofeti ngeenge a kundila po eongalo,” ta ti. Shivute okwa ti omuprofeti okwa fiya po omwaka wakula meongalo lavo nomomukunda.
Omalongekido epako laye oku li metifa.