ENGELA – Otombo oyo oshikunwa shi na ovanwi vahapu moNamibia aishe koonono molwombilixa yayo, yoo vali oyo odjo youxupilo momikunda nomomalukanda, ashike vati oyo vali oshietifi shenyonauko kamana mokati kovanyasha novakulupe.
Omunamido 55 Deolinda Nghikundwavali omukalimo womEngela moshitukulwa shaHangwena okwa hokolola kutya yee okwa tameka okudunga otombo mo2009.
Nghikundwavali okwa yelifa kutya eshi she mu fininika a tameke ongeshefa yotombo oluhepo, shaashi iha longo yoo ongeshefa yotombo oipu okutameka, shaashi oi na ombilixa yoo vali ohai landwa.
Omukainhu ou, ina younona vavali, okwa ti ohashi mu pula ashike oilyavala, osuuka oshoyo omeva opo a ete po Namhila.
“Oinima ei nda tumbula apa ohandi i tula kongoma ndele tai nangala tai pi nawa. Ongula eshi handi ya okupatulula ohandi hange nale otombo ya pya. Oilyavala mongoma oha i kala mo oule womwedi fiyo ya ninga etapili. Ngeenge ya ningi etapili ohandi i tape ko ndele handi tula ko oilyavala imwe ipe,” Nghikundwavali ta yelifa.
Ashike ndohototola umwe oo a pula aha tumbulwe kedina okwa ti, ovanhu vahapu ova wila mohole notombo okuyelekanifa nomaludu makwao.
Ta ti oikunwa yokeengoma oya didilikwa ya hapupala komaushai nomomalukanda, yo ihai longekidwa monghalo youkoshoki shaashi kape na omifindalandu dokushikulwa nghee i na okulongikindwa.
Kakele koundjolowele, ope na yoo oshipulifo kutya mbela otombo oi na eepelesenda doalukoholi shaashi ihadi metwa.
Ndokotola okwa popya kutya oikunwa yokeengoma aishe oi na omawii mahapu noya nyika oshiponga okuyelakanifa nouwa. Omaupyakadi haa etelelwa kotombo ongaashi, oudio oo hau etwa koalukoholi ya pitilila, engwangwano mouluvi shaashi omunhu iha kala eshi apa e li nohai piki ovanhu.
“Otwa didilika yoo ovanhu vahapu ve na omanyutu shaashi otava nu ashike, voo itava li. Vahapu natango ohava kanifa eehonde molutu, vamwe otava kungu voo vamwe ove na oipute i li meni momadimo molwoudio wotombo,” Ndokolotola ta ti.
Ovanhu ve li meedula 40 fiyo 50 ovo vati unene ookadenga ngee tashi ya kokunwa otombo. Ashike onghalo paife otai limbilike shaashi nounona vaniingholi navo paife ova kwatwa ko. Ounona vati ova ninga oihakanwa yotombo shaashi otava putuka momaumbo hamu dungwa Otombo.
“Fye kouministeli woundjolowele otwa hala okutula oshikumungu shedungo lotombo sha talwa nawa, unene ngeenge tashi ya poukoshoki osho yo omukalo ou hai dungwa. Otwa hala yoo tu mone omukalo wokumeta eepelesenda domalodu di li moshikunwa omu opo di kale di shiivike. Otwa hala yoo oshikunwa eshi shi kale yoo shi li xwepo kashona nokunuwa nonande kashi na ouwa washa shaashi otashi li ovanhu tashi endelele,” ndokotola ta yelifa.