Kuna kugendapo nawa asi vakadi konomukunda doponze kuna kugwana mavango go umpitisili pampo.Ogu katere asi eyi kuna kara montenda kakere muuyungi gona gombongarero zanavenye mugolikadi Doreen Sioka, ogu kayitumbwire asi kuna mupe sitetu mokumona asi vakadi kuna kuvapa mavango goumpitisili pampo kupita kana, omu yakere nare komeho sirongo sika manguruke. Ame nina hafa pokumona asi kuna kara nahompa gomukadi, yimo ana kutanta Sioka apa kava mupulire wosayitunga za New Era. Age kayidimbwilire eyi paapa vana kara nelikwamo asi twara mbongarero zanavenye kovantu, yipo kakamwene asi vakadi vanalituramo varete malisinto monkarapamwe. Ntaantani tupu,New Era kwapuragererere vaforomani vatatu wovakadi kavakere womomukunda horowero gwa Ncuncuni moKavango.Apa kava vapulire awo kava tente asi kuna kuyimona eyi asi mulyo morwa nawo nava kambekako kuwoko keparu lyovantu wopomukunda gwawo.Eyi yina kuninkisa vavapandure kwato gumwe gwawo ava futu awo kuruganena vantu vawo ndi asi punyu. Hompa Angelina Matumbo Ribebe yige ana kara gova Sambyu ano age kugava yirugana kovaforomani wovakadi vamwe vawo womomukunda horowero gwa Rundu Rural West awo kuna kara Emillie Shikue gomoMavanze, Veronika Hausiku gomoSharukue ano ogu Runguro Mbangu kwamuhorowere momvhura ezi zina puko akare foromani gomo Kauti.Awo kulituramo asi varete eparu lyewa kovantu vawo. Kapisi yeeyi tupu youforomani yavatumbikira nye awo kuvatera vantu nampili koudigu wonzara apa azi pilire kuroka nawa mvhura.Apa nye katu vapulire nani yinke yirugana yawo, awo kavatente asi kuruganena vantu womonomukunda dawo, kapisi ureru kupangera vantu wovanzi ngesi.Nsene asi ove mpitisili wahepa kudiva asi ngapi omu norugana novantu ndi nonkwami doge. Kapisi kukara gokuhandauka.Kapisi onwe marovhu pombunga ntani hena wahepa kukara nomu kara gomuwa mombunga yimo ana kutanta foromani shikue. Nsene ono kara moumpitisili wangesi hansa diva asi ove wahepa kukara nomukaro gomuwa. Simwe soyitumbukira yawo vaforomani kwavahuguvarera kufutisa mutero vatware komberewa zorudi. Nkenye gumwe gatunga momukunda ogo nye nomvhura dendi murongo nahambo ndatu gahepa kufuta tupu nkenye eyi ono weke, mahangu yimaliwa ndi nkenye eyi. Yimaliwa oyo kuvatera egendeso lyorundi. Pwanare hompa gapongayike yimaliwa oyo makura tayi gavere koworuna gumu rukukutu. Foromani mbangu katente asi ngendeseso zangoso kuna kutundamo nye vahepa kuzikevera yipo asi vana vetu novatekuru vetu vaya paruke parupe rwangesi. Udigu umwe ou ana kumona foromani gwa Rundu Rural West kuna kara womema, mahundiro nare vagaturamo asi vayavamborwerepo nopomba yipo vagwane mema.