Sinzi sovatungimo moKavango kuna kutanta asi namvho lyoruhanzo. Utjirwe owu kuna ninkisa vagave ntumwaraka pangenderera asi vantu ava vatunga pepi nomukuro vakare vana vangara ndi asi vatameke kupapara mavango aga vana kumona asi kapi tapayasiki mema goruhanzo. Mukuro gwaKavango nare kuna pitakana nomukindiko dago,morwa mvhura ezi zonene zina roko movamusinda vaAngola,omu mwakara asi yimo ava gwanene uwa womvhura. Ogu kageve ,mbudi ezi koradio kakere munekuto Sebastian Kantema mukurona gomberewa zovakansela moKavango,nokuhundira asi vantu vakare vana vangara ruhanzo kuvhura kuvagwana awo ava rarera.Yitetukiso kuna kara asi mukuro ogu kuna kuhanza nkenye ezuva.Ago kuna kuligwederera nonometa mbali mwankenye ezuva.Ngesi mema aga kuna sikama po 6,57 kuhetakanesa nonometa 4,25 edi dakereko mvhura ezi zina pu siruwo seesi. Simpe kava yitente asi nomuramba nadinye dakara pepi nomukuro dina hanzere ano vatungi popepi nomukura simpe kapi vana tameke kuligumagura vakanduke koyituntu oku naga pira kusika mema.Mokukwamanye mbunga ezi zakarerapo yihorokwa yomunkama,ndi asi Kavango Regional Emergency Management Unit nare vana tameke kuturapo nonkambadaro asi ngapi navapopera vantu apa naru wiza ruhanzo. Mosiruwo somapuragero Kantema katente asi mulyo unene vantu vavapukurure vadiveko yuma yipo asi nawo vene vakambadare eyi nava vhura kurugana,yipo asi vahandindira dogoro mema momambo gawo ntani asi tuvatereni. Kapisi tundindire epangero asi ngali yatudirura noyimuna yetu. Ose kwakara nomukaro gwina asi tanko tundindire,nye siruwo sina siki asi nyamwetu nose twahepa kugazara asi yinke tuna kurugana yimo ana kutanta Kantema. Age simpe kahundilire vantu vaze koyituntu paapa ngesi kapisi vandindire.Simpe kahundilire ava vakara monokomitiye dekuliko novatungi monomukunda vatameke kuruganako yuma vaha ndindira. Koruha rwawo wombunga ezi zosinka soudigu vana pilire kundindira nare kuna kugazara kuzigida sigongi somunkama kumwe novakwatesiko vawo yipo vaya turepo nonkambadaro asi ngapi nava vatera owo runa gumu ruhanzo.Vapumbi mpepo kuna kutanta asi mvhura kuvhura ziya roke simpe konomukunda domuzogo ezi vana kungungunyikira konoperesenta 20% Nampili ngoso mupumbi ogu Victor Kaurimuje,komberewa zawo zomoVenduka katente asi epumbo olyo kuvhura kulitjindja.Dogoro ngesi kuna kulikida asi nomukunda ngwendi Kavango naCaprivi yido dina gwana mvhura zonzi mosiruwo somurokwa esi.Eyi kuvhura yitwaredere asi kuvhura kuhanzera moKavango ndi asi nomukunda edi dakara asi konontere domukuro ndi mavango gokuhanzera. Mvhura ezi zina pu mvhura zokusika ko 32,3 mm kwarokere moCaprivi mokwedi kwa Sindimba 26,ano poNkurenkuru moKavango kwarokeremo zokusika ko25,3mm.Kantema kahundilire vantu owo vatunga pepi nomukuro asi valikunge kovangandu,nomwe nomazoka aga aga kwama mema. Makwedi aga gana piti vantu ntantatu kwavadipaga vangandu novamvhuu monomukunda edi Kavango naCaprivi.Kutunda tupu mwaSikukutu mvhura ezi zina pu vantu ntazimwe kwavadipaga ngandu ano ava vavali kovamvhuu monomukunda dodo. Yihoropkwa oyo nayinye kwatamba vanona ava vazoganene momukuro ano ava vavali kwahugire.Ruhanzo rorunene moKavango kwahorokere mo2003,omu nombuto vakunine konontere domukuro vadipitwilire dize nomema goruhanzo.