RUNDU-Morwa kapi vana kara hena ngesi momukaro gokulirera pwavene, ntani totusesu otu vana kugwana kepangero, kuna kutwaredera asi vakurupe ava ngesi kuna kumona kanyando kanyando aka nakapira kuhaga mwawo. Sayitunga zaNew Era, momandaha gana puko kumwe nanguuru gomukunda Kavango, Maurus Nekaro, apa Nekaro kakadingwire wontundiliro zaAngola vana kara ngesi moRundu korukanda rwaNdama. Vantu ava eparu lyawo kuna kara momukaro gomudona unene ago hena kapi taguhaga usimbu. Wongereka zaKatolika koNdama ava vana kara nelikwamo lyapunyu mokudingura mambo yiwo kava kagwene muswamane ogu ana kara meparu lyedona unene. Gonomvhura 90, Joseph Kamwere Hamutenya ogu gatunga mokambo kokanunu, embo eli vatungisa koyivera yomahauto noyiplastika. Age kwatundilira komuzogo gwaAngola ntani age kwawiza moNamibia aya papare yirugana.Ano nye apa gaya hageka kurugana, kapi hena gakara negano lyokutengura moAngola morwa muna kara yita. Hamutenya katente asi age kwakere mukwayita gwa National Liberation Front of Angola (FNLA) siruwo sekondjero emanguruko age garuganene mokamba ezi ngavatumbura asi Bufalo, koutokero waCaprivi omu ngarwanesa vakwayita vaPeoples Liberation Army of Namibia (PLAN) ava vakere asi mutayi gumwe gombunga zaSWAPO. Vakwayita wovasovagani kwavapere vakare netokoro apa yahege yita. Kwakere asi tozi nonomburu kosirongo sawo koSuid Afrika ndi tokara moNamibia.”Ame yipo nye natokwere asi tani kara moNamibia. yimo ana kutanta ngoso Hamutenya.
Hamutenya katanterere Nekaro asi age kapi ana kara nonondja ndi ekoro. Yipo asi age kuparuka tupu kovamusinda ntani kovafenkenda ava muvatere mokumupako nondja. Ano mukwawo zendi Joachi Uasuka (99) age ngarugana kodwayine. (Johaneesburg). Apa nye nahageka sirugana hawe ame yipo nye nakara moNamibia, kapi natengura hena koAngola, morwa yita eyi nye yatwimine mosirongo sina. Ngwendi Hamutenya, Uasuka nage kapi gakara nonombapira dopaveta morwa nombapira dedi dapya komundiro.Beata Kaliye, mufisa yendi, kwatunga pwamwene vana vendi navenye vatatu vadogoroka. Kaliye katanterere sigendo saNguuru asi age kutoragura tupu nondja napa nopena makura tatereke nye mwene. Nage kuna fana ngwendi vakwawo vavali kapi gakara nonombapira dovharerwa. Vakurupe navenye ava mambo gawo kwagatungisa koyipereki yomahauto vatoragura ntani yimbapira tupu ngoso. Kaliye naUasuka mambo gawo awo muntu gomure kapi tovhuru kusikamamo morwa nonsupi. Morwa marutu gawo awo hena vana kurupa kapi tava vhuru kurugana sirugana sosidigu yipo asi vagwane sakulya. Gumwe gowo kavakavagwene kuna kara Teckla Hakusembe, ogu katanterere sayitunga zaNew Era asi awo kwatantera nare mukaro gwangesi kovagendesi nye kwato eyi varuganako. Ose twatanterere nguuru gakeremo nye kwato eyi garugeneko. Ano ogu nye gwantani hawe hansa, morwa age kuna kurugana nsene vantu vanayimupe. Age hena kupitakana vakansela ava vana kara asi awo kapi vanakufira vantu vawo sinka. Nekaro katente asi Hamutenya udigu kumuvatera morwa kapi ana kara nonombapira dovharerwa, eyi ana kara nayo mbapira tupu zekuhwo zokongereka.Yousili ou udigu wounene, morwa muntu wahepa kukara nonombapira yipo nye vakutjangese ogwane uwa ou vana kugwana vantu kepangero. Ano Nekaro kahundilire nye vanangereka asi varetepo egano asi vantu ava ngapi navavavatera. Kuvhura tuze tukarande nondja ngesi dovantu ava nye yilye nayavaterekera. Ntani vantu vatunga pepi kuvhura hena vayavake nondja dawo. Yimo ana kutanta Nekaro ana kara noutjirwe.
Vakadi kuna kara moudigu,morwa apa ava kara asi vawaawa kuparuka notutotusesu ntani awo kuparuka siruwo noruhepo naro ngosikwawo.