Nampili ngomu vana kusivana asi kuna kusikama momukweyo gomure hawe mberewa zina parapo asi navenye vahepa kuvatjanga,ava ava gwanenemo uwa mouyimaliwa eyi youkurupe.Eyi kuna kuyigavera morwa kapi vana hara kehagero vakazuvhe asi vakurupe vamwe kapi vavatjangesa. Moyivike yitatu yina piti vakurupe womoNamibia kwakuvatjanga yipo asi vagwane N$350,00 ezi ava gwana nkenye kwedi.Mugendesi kurona gombunga ezi vana kutumbura asi United Africa Pay Master munekuto Gerry Munyama katente kwaNew Era asi navenye ava yina tumbukire kugwana yimaliwa eyi vahepa kuvatjangesa yipo vayigwane.Negano lyoku katjangesa vantu vana siki ko180 000 noyipana 22 kuna kara sirugana sosidigu esi zina kumona mberewa zendi. Morwa epiro kudiva asi vantu vangapi pwankenye mukunda kuna kureta marangapeko pomavango tjangesero gamwe.Awo kuna kungungunyikira muvaru gomununu nani vantu tavavhuka ano mavango aga vana kugazara asi vantu vasesupo awo tavagogomoka yipo asi kuna kuninkisa nye vamwe pomavango gawo vandindire siruwo sosire ano vamwe navayasika nare spana setu sina tundupo.Eyi kapi yina lisigi nomu ava wiza vantu vetu vayakitjangese nsene mahorowo nomukweyo ngoroo dina kara kapi dina lisigi.Kutunda tupu apa lyatameka elitjangeso eli vantu vetu kwatameka kusivana asi vakururpe vetu kuna kusikama momukweyo siruwo sosire vandindire wokuyavatjanga. Age katente asi kapi ana kuyirwanesa oyo morwa awo kuna hara asi nkenye mukurupe vamutjangese,yipo asi vakagwene eyi yina vatumbukire.Kuvhura kureta mapiyagano nye kuna kara ngendeseso zina kara asi nkenye gumwe agwane eyi yamutumbukira.Kugusako maudigu aga gavali nina tumbura ruhanzo moCaprivi kapisi kuna gumu tupu ava vatunga mevango olyo lyazambezi,nye kuna ninkisa nose turundurure mavango gokulitjangesa gaze kevango peke.Nampili ngoso ose tuna lituramo asi kwato ogu ngava siga.Ose kapi tuna hara kusigako nampili gumwe.yimo ana kutanta Munyama.Elitjangeso eli kuna liretapo morwa kapi tuna hara kufuta yimaliwa eyi nye nampo mwenya yimaliwa nare gatusiga.Pwanare vakurona vamwe kapi ngava siki komavango gokutambwira nye tava tumuko vawo,ano owo ngava tupu nokukasikisasi yimaliwa oyo kwava yatumbukira. Ntani ngaku zuvhayika asi vamwe ngava tambura yimaliwa oyo siruwo oso ogu yatumbukira nare gatu siga. Eyi tuna karere nelikwamo lyangesi yipo tudive nawa -nawa asi owo vana kugwana yimaliwa oyo vavava yatumbukira.Ose kuna hara kutura ngendeseso ezi moyirugana yipo asi elikwamo lyepangero lyokuruganesa yiruganeso momuwa liwape.Sirugana esi kuna kusirugana mbunga ezi zaUnited Africa Group mokusikisamo etokoro lyepangero. Mokukwama sintokorwa 10 sediveta somo1992, ministeli zoyirugana ntani zehatakano nefiro sinka vanona vahepa kufira sinka asi vakurupe novanona vavatjangese yipo vagwane mpito zokugwana uwa wawo.Ngendeseso zangesi kuzirugana nkenye apa konyima zonomvhura ntatu.Elitjangeso kalihege moutatu una puko,ano awo kava manesere tupu vakurupe ava vakara asi kugendere poyipundi.