Taimi Haihambo
Ongwediva – Ovanambelewa kombelewa yOmbudsman otava ende noikandjohoololo moshitukulwa shaShana nelalakano okulonga oshiwana kombinga yoilonga yavo, nokupwilikina yoo omikundu dil i moshiwana da pamba ombelewa oyo.
Onghela ovanambelewa kombelewa oyo ova talela po oshiwana moshikandjohoololo shOndangwa yomodoolopa, omo va uda omikundu da pamba eyambidido olo hali pewa oshiwana keembelewa depangelo moshitukulwa shavo.
Shimwe shomoinima oyo tai nyenyetwa kOvandangwa ove li notava keme enota olo unene le lihanena pomudingonoko Omashaka opo vati pe na vamwe tava nu momatale.
Ovakainhu ovanyasha vamwe otava hokolola va li hava teke momaushiinda ashike ovashiinda paife ova tameka oku va pula ondilo mendini lomeva.
“Eshi ohashi tu fininike tu ka teke momatale omo mu na omeva inaa koshoka. Opo nee tu dule oku a nwa, paemhito dimwe ohatu ka tala omiti dokuyeleka omeva koshipangelo,” Neami Mbwale ta tumbula.
Neami Mbwale oo ehe na oilonga okwa pula opo elelo lodoolopa yaNdangwa li ninge onghendabala opo li va yambidide nopomba yomeva voo taa kala hava futu ondado N$ 5 kokakalata keshe mefiku.
Ovakwashiwana ovo tuu ava natango otava keme ondjala oyo tava ti oya hanya unene molwonghalo yokuhe na oilonga.
Omukalimo umwe okwa weda po kutya voo mOmashaka ove ya mo mo2018, va landa edu kumwene wepya omo va dika oipeleki yavo. Momudo oo tuu oo okwa li va ninga eindilo lomeva ndele elelo lodoolopa ola anya oku va pa omeva.
Ashike omupopiliko welelo lodoolopa yaNdangwa Petrina Mutikisha eshi a popiwa naye kuKundana okwa ti ovanhu ovo inava dula okupewa omeva shaashi peenhele opo ve li kave li po paveta.
Ta ti elelo lodoolopa ola yandjele eembapila komaumbo aeshe a li meni leengaba dodoolopa yaNdangwa mo 1997 omo va li va kunghililwa opo vaha yandje eenhele.
Oovene vomapya navo kave na oufemba wokupa ovunhu onhele. “Keshe nee ou ta ka yandja onhele inashi dja pamulandu wodoolopa ita ka pewa omeva ile olusheno,” Mutikisha ta tumbula.
Okwa weda po yoo kutya keshe ou a hala okupewa omeva nolusheno na lande onhele tashi ende pamulandu welelo lodoolopa.
Kakele kaavo tava nyenyeta omeva, David Thomas Akooko womoshikandjohoololo osho tuu osho okwa li a holola eudonai laye, ombelwa yakansela oyo vati hai yandje eetendela kovanhu tava di kondje yoshikandjohoololo.
Akooko ta ti moshikandjoohoololo omu na ovanhu vahapu tava dulu okupewa eetendela ndele ihave di pewa.
“Ombelewa nai ninge onghedambala opo i tu pe eemhito edi shaashi nafye ohatu dulu okulonga po oilonga ei, fye tu limonene po omboloto yetu,” Akooko ta tumbula.
Ombelwa yOmbudsman natango oya ninga onghendabala okutalela po eembelewa deekansela moNgwediva, oshoyo Oshakati West ndele kape na omukwashiwana a haloka.
Ovanambelewa vOmbudsman ova ti shito ohava mono omwaalu wovanhu vahapu tava holoka poyoongalele yavo, ashike eenhele edi da nyika okukala momikunda, ovakwashiwana ihava hale lela okufika po omolwaoinano ile oshoyo oyiimbi yonhumba noyongadi.