Taimi Haihambo 

Omupopiliko wopolifi moshitukulwa shaMusati Anna Kunga okwa ti vatatu vomovanadolongo va lopotwa ve livaka mokakuma mexuliloshivike kOutapi ova monika. Otaku hokololwa ovanadolongo ava va li vamwe vomeenghwatwe heyali odo vati de livaka modolongo yaUtapi konima eshi vati va teta oipeleki yonduda omo hava nangala. 

Omukulunhu wopolifi moshitulwa Ishmael Basson okwa ti opolifi oye lihanga moshikumungu eshi shaashi odolongo yOutapi, oya finana shaashi vati odolongo yaKahao ei ya li nayo hai kwafele moshitukulwa otai longulolwa paife ovanadolongo meesela ova li mo ashike va finana. 

Okwa twikila kutya nande ongaho, ngeenge tashi ya peyameno osho yo okuhada ovanadolongo, va fye oshisho kutya ovanadalongo kave na oilwifo osho yo keshe eshi sha ngabekelwa meesela ohave shi ningi, ashike ihashi ngwa keshe efiku. “Out na ounghundi wovanambelewa ovo hava kala mekwatafano la puka novanadolongo, tave va etele oinima ei ya ngabekwa modolongo unene tuu eengodi. Eshi nasho otashi dulu okukala ondjila osho yo omukalo upu opo ovanhu ava ve livake modolongo, shaashi katu shi vali naashi hava weda po,” ta ti. 

MuApilili neudo opolifi oya lopota ovanadolongo ve livaka modolongo yaNgoma moshitukulwa shaZambezi, konima eshi vati va dula omupolifi eenghono oo a li ta patulula eesela davo. Movanadolongo ava vati omwa li ovakwashiwana vaZambia ve li vatatu ovo va kwatwa, nOvanamibia vavali ovo ve liwe molukongo natango. 

Natango muJuni neudo omwa lopotwa ovanadolongo ve li 11, ovo ve li pokati keedula 14 no 17, ve li vaka modolongo yaLuno, moshitukulwa shaShana konima eshi vati va teta oipeleki yeesela davo. Ovanadolongo ava vati ova kwatelwa mOshikoto, Ohangwena nOshana. 

Omupopiliko wopolifi moshitukulwa shaMusati Anna Kunga okwa ti ovanadolongo ava ova patululiwa oibofa yefadukepo, noi na okuwedwa koibofa yavo ei tava pangulilwa. 

-taimihaihambo2000@gmail.com