Zebaldt Ngaruka
Ohambo Jatate- vanafarama vavali momukunda gwaOkauarongo momukunda horowere Omaheke moOtjimbinde sinkwa ntani kavazumbanesere nongombe dawo ntambali koruvadi.
Okauarongo kwakara no km 14, komuzogo gomukunda Tallismanus. Okauarongo mutungimo gwamo Stanley Tjozongoro, ogu kakere apa kasihorokere simpagwa esi, omu kangambiparere sihorokwa nasinye, kayinkondopekere koAgriToday asi nongombe ntazimwe kwakara dekoro lyoKavitjene, ano ezi zimwe kwakara asi zaUaanazo Ndjarakana.
‘’ Ezi kasikere sihorokwa sosidona unene. Eyi kapi yahoroka rumwe mevango eli twatunga, ntani kuna kumoneka asi udigu unene morwa kuna yahoroka posiruwo esi tuna kara asi moruteni omu natuvenye tuna lituramo asi tupopere yimuna yetu,’’ yimo ana kutanta Tjozongoro, ogu gakara asi musinda nekoro lyoKavitjene.
Gonomvhura 55 Nguundja Kavitjene, ogu ana kara asi ana zumbanesa unene, katente asi eyi kuna kara yokukora unene, eyi yina kara asi ngesi esi sikando nye sauvali vana kumona udigu wangesi sopomuhowo age kwazumbanesa nongombe 50 morwa rukukutu.
“Ose kuna kara mosiruwo sosidigu. Ngesi kapi tuna diva asi kurugana ngapi, morwa ame ngesi kuna kara tupu nye negano lyokusiga eyi younandima wonongombe.
Nampo kuna kara asi yirugana yaKarunga ndi nampo urodi; ame ngesi kapi nina diva,’’ yimo ana kuhuyunga Kavitjene ogu ana guuhu unene, ogu ana kugazara ngesi asi akare nye tupu munafarama goyikombo nononzwi.
Mokumupurako nye asi yinke vana rugana nonongombe edi kadifire, Kavitjene katente asi pampo zawo nyama zinafu koruvadi kapi avazili. ‘’ Ose katuzihwikire nazinye, eyi yina kuliza nomapuliro ngetu. Kakukere vamwe kavahere kulya nyama ozo unene vadinkantu nye katu vasilikire.’’
Keri Kavitjene Kaurivi age katundire ko Rooibelt ayahengagwide vakurona vendi apa nye kazuvhire mbudi zondona zoruguho.
‘’ Esi kuna kara mbudi zokukoresa unene, nye ose nyose wolye tuture asi yinke yina kuhorokera tupure Karunga?
Otate muntu gumwe ogu gakara asi kukanderera unene, ntani awo kavakere nomakanderero poTallismanus komeho simpagwa sangesi sikahoroke.’’
Yimo ana kutanta. Kaurivi, ogu arugana asi muvateli paukanguki ogu nye gakara asi muhungi mwenyo posipangero gono saTallismanus, kahengagwidire vakurona vendi nokuvahundira asi vagazare monoruwa posiruwo esi sosidigu. Nonkambadaro dokugwana Ndjarakana hawe kapi kayitompokere.
Posiruwo oso, kansela gomukunda Wenzel Kavaka katente asi nage ana zuvhu mbudi zongoso, nokutumbwidira asi nakadingura vekoro owo yina gumu. ‘’ Ame kuna yizuvhu tupu, nye ngesi nahepa kuzako nikatare, nokutara nye asi ngapi natuhengagwida vekoro owo yina gumiu, morwa esi sikando sauvali vana kuzumbanesa nongombe dononzi ngoso.’’
Yimo ana kutanta kansela. Kavaka kagwedereko asi age nazako akatare asi yinke yokuvhura kurugana, nokugava nye yitundwamo kokomitiye zakarerapo rukukutu. ‘’
Esi kuna kara sihorokwa sosidona unene, ose natutara nye asi komitiye zorukukutu yinke nazivhura kuvatera.” Yimo ana kutanta.