Elizabeth Hiyolwa
Nkurenkuru-mukarelipo gwaAngola moNamibia Oliveira Francisco-Guilherme kakadingwire komberewa zanguuru gomukunda Kavango zoutokero Sirrka Ausiku sivike esi kasipwireko. Mukarelipo gwaAngola kumwe novarugani vendi kavakere nosigongi naAusiku moNkurenkuru, komeho nye vakaze nelikwamo lyokukadingura nomurudi dakara moNkurenkuru ntani poKatwitwi. Ausiku katente asi age kayimuhafesere komagano aga kavakere nago vaAngola mokuwapukurura eruganeno kumwe pokatji kaoyirongo eyi yivali, omu kahundilire asi varuganene kumwe unene posiruwo esi uzuni una ugumu momunene uvera ou woCovid19. Posiruwo nye esi soCovid 19, eruganeno lyetu kumwe lyahepa kuwapa. Namupandura unene eyi muna wiza komberewa zetu mwankenye siruwo nose natukangongora konomuvero deni’’ yimo ngoso ana kutanta. Guliherme mokulimbururako, katente asi mokurugana kumwe ngombunga zimwe tupu mulyo unene pokatji koyirongo eyi yivali. Age kahundilire varugani monomberewa pokatji koyirongo eyi yivali varuganene kumwe.
‘’Mukaro gokuruganena kumwe guna kara mulyo unene, pokatji koyirongo yetu eyi yivali. Ano ose tuna manamo unene mokuruganena kumwe none,’’ yimo ana kutanta. Posiruwo nye oso sedinguro, awo kavadingwire nomurudi edi mbali dina kara asi Kwangali ntani Katwitwi. Mosiruwo nye esi somunkama morwa kambumburu aka tuna kumona mosirongo ndi mouzuni Covid19, eruganeno kumwe pokatji kovaporosi vetu mosiruwo nye esi soCovid19, yehepa kukara yina kwata moyitji pokatji kovaporosi vaAngola ntani vaNamibia, morwa awo yimo vamwe vana kumona asi yirugana yohepero yihoroke unene ngwendi maroli aga gana kutwara yiruganeso yohepero ponomurundi gana kupitira. Guilherme age kwamupa nye ayakarerepo nomukunda edi ne moNamibia, Kavango zoutokero, Kavango zoupumezuva, Zambezi ntani Otjozondjupa omu yina kara asi age kwatameka yirugana eyi mokwedi kwaSindimba mvhura zina puko.