MoVenduka-Vantu namumbyendi oEnkali kuna kumoneka asi tava zumbanesa ekondjero lyawo evhu koministeli zevhu nouturo nomuruganikurona gumwe goministeli ezi.Hamutjanga gokukarereramo mouministeli wevhu nouturo Frans Tsheehama,ntaantani tupu katanterere Ben Shinime Enkali naJosef Enkali asi vahandindira mbatero nkenye koministeli.
VaEnkali ava nare vaguse udigu wawo ou kumwe nomurugani kurona gwanare koministeli ezi momukunda gwaOmaheke Erastus Nghishoono,omu vagenda vagwane farama ezi vana kutumbura asi Schellenberg 79.Nghishoono nomurugani gwanare koruha routuro Simeon Kanyemba yiwo vareta vaEnkali ava pofarama ezi vatunde koDrimiopsis 2002.Awo kwavaretere nokuvakumbagera asi uministeli kuvhura ngava vape farama ezi vayatungepo.Awo yiyo vatunga nye pofarama ezi ure wonomvhura ntano dogoro mwaNsinano mvhura zeezi yipo yina litjindji asi kapi vawizapo paveta.Esanseko lyetu limwe eli twageve kwatente asi Nghishoono kwaheheda farama ezi kwaAdraan Nigrini,gomvhererwa zaSuid Afrika.
Mokugava farama ezi pehehede lyangoso awo kwatezapo elizuvho ndi ngendeseso zepangero ezi valizuvhire.Nghishoono ngesi ana yamono asi kwarugana epuko makura yiyo gayahere asi ngano atjidemo vaEnkali mofarama.Apa nye vamwene asi Nghishoono kuna hara kugava farama ezi kosirumbu awo nawo tava parapo asi kapi vana kutundamo mofarama ezi.Awo kuna kuyimona asi Nghishoono kuna kuvagenda sihingilisa nye nawo kapi navatundamo mevango eli.Pomuhowo age kwapete mema gokunwa vantu rokukwamako taya pata mema gokunwa nongombe.VaEnkali ngesi eyi vana kurugana kuna kututa mema monondini vatunde koGobabis vatware kofarama nokilometa 30 yipo nongombe dawo dikanwe.
Ngombe zawo zimwe nare zafa morwa enota,awo ngesi kuna kara noutjirwe asi yimuna yawo kuvhura yife eyi vakunga nomvhura dononzi.Awo ngesi kuna kara nonongombe 153,ano yitana 650,ano siruwo oso mwenya farama Nghishoono kuna kara tupu nonongombe 11,noyikombo tupu yongandi.Hamutjanga gokukarereramo Frans Tsheehama kwadamuka tupu yiyo gatjanga mbapira zize kovahahende wovaEnkali,Kempen naScoltz.Kuna kumoneka asi eyi varugana oNghishoono naKanymba kapi yina kara hena nomulyo.Mokukwama makona kono getu vantu ava A.B na J.Enkali kapisi paveta vana kara mofarama ezi,yipo asi ose kapi tuna kuvapulisira vakaremo.Kuna kumupukurura hena asi udigu womema ukare udigu woEnkali naNghishoono morwa yiwo vaturapo malizuvho ogo.
Yipo asi tantera vantu woge vasivanene Nghishoono morwa yige mwenya evango.Ben Enkali kayimutukukisire mokuzuvha elimbuuro lyangesi morwa age kwadiva asi epangero ngano yilyo nalifira vantu ava vana pili uturo vagwane uturo.Nye ngesi kuna kumoneka asi kapi vana kara nosinka koyimuna yetu.Ame hena nina hara kuyizeresa asi Nghishoono yige mwenya farama mokukwama nombapira detu owo oEnkali ose kapi twavadiva.Nampili ngomu nye Tsheehama ana kukondja ngoso kapi vana diva asi mwene ogu Nghishoono gelike garugene elizuvho eli ndi nampo naKanyemba.Epuro kuna kara asi nani vene ava vanamberewa kapi tava vhuru kutokora pwavene ndi?
Apa nye vatidire ava oNghishoono naKanyemba vantu mofarama 2002,kwakere pwavene ndi pamberewa?Apa nye Kanyemba kazigidire vaporosi vatunde koGobabis vayatjide Ben Enkali mo2002, kwakere paveta ndi hawe?
Tsheehama gahepa kuyizeresa kovantu eyi asi siruwo musinke nava rugana varugani vendi matokoro gouhunga?Nampili ngoso mberewa ezi zina karerepo umbo kazigwene yitundwamo yoministeli nazo kunahara kukakona kona asi yinke yina kuhorokako kwene oku kofarama ezi?Noa katente asi mberewa zendi simpe kapi vana tumuko vantu vakakona-kone.Nye momazuva gaSiwogedi 2007,kuvhura vatumeko vantu vakatameke nomakona-kono.