Vakwetu, ose kuna kututoona oku tuna kara mosirongo saCongo Brazil, nye aw okapi vana hara kutupa nopassport detu. Tuna hara kuwiza kembo, nye aw okapi vana hara kutupa nopassport detu, awo kuna kuturoya. Mbudi zangesi kazitumine murongwa gumwe ogu ana kara ngesi mosirongo sooso, ana kulirongera posure vana kutumbura asi Loudima Institution for Training and Vocational Training mosirongo saCongo Brazil. Sinzi sovarongwa kavatente nkera asi kapi kapa kere elikwamo limwe ntudi kuduka yipo opopere mwenyo goge, vaporosi kavakere asi vahepa kukara negano limwe omu navagusapo mukaro ogu vana kara nago vanasure gokulyatera yipo asi vagave runyegenyo rwawo kegendeso lyevango lina.
Sayitunga zaNew Era, kaziuyungire novarongwa vene pangodi ntani vanamberewa vaNamibia vana kara pevango lina, mokuzuvha kwavene asi ngapi yina kuhoroka ndi asi mukaro ngapi guna kara pevango lina. Navenye kavauyungire kavakere noutjirwe morwa kuvhura vavakwamakwame nye mbudi zawo hawe kazizuvhikire. Konyara kuna karapo varongwa wokusika ko 100, vana kulirongera pevango lina, mokukwama mwawo, elyatero kavalitulisirepo valikida asi awo kapi vana kugwana muteku gomuwa, evango eli kwakara tupu mowiza ngoso koyiha mbindakano lyosirongo saCongo. Gumwe munamberewa kauuyungire kosayitunga ezi, muNamibia, katente asi eparu pevango eli nogu ana kara asi mutjwayuki hansa, ndi asi apa vakondjerere sirongo eparu kwakere peke. Morwa siruwo sina vantu koyili vakondjerere. Kapi pana kara konda nkenye asi vana vetu simpe vakare nomukaro gwangesi,yimo ana kutanta monamberewa ogo. Mokukwama varonga ava eroyo kuna tameke paapa kavagara nelyatero asi ngano vagave mbapira zawo zorunyegenyo gomugendesi kurona pevango lina, Daniel Ngodji. Nye age apa parapo asi kapi natambura runyegenyo rwawo oro vanatjanga. Apa nye ana vasigi awo yiyo nye vanazi komukuronagakahurako, nage yiyo ana kavatjida momberewa zendi. Apa nye tuna parapo asi kapi tuna kutunda momberewa zendi, makura age yipo ana zigida vaporosi, awo hambara vayakwate munamberewa, ogu vana kugazarera asi yige ana kusininika varongwa valyatere. Kuna kumoneka asi age Ngodji kapi ana hara vaNamibia vakare asi varongwa ndi varongi nye kuna kupulisira vaCongolesse vahwilire momberewa zendi. Varongwa kuna kutanta hena asi epangero lyaNamibia, kapi lyagava simaliva vavatumbwidira yokusika koN$1 000, yomokwedi. Mukaro kapi guna wapa, vaNamibia vakare asi varugani ndi vanasure kuruganesa nomfewa dimwe tupu. Vamwe kuna kutanta asi awo kuruganesa yimaliva eyi vavapa vakurona vawo, morwa kwato eyi vana kugwanako kepangero, awo kavatente asi siruwo sokuhulilira vahura kugwana silinga kepangero lyaNamibia, mwaApril mvhura zina puko. Mvhura zina puko kwatupere tupu N$300 yiso siruwo twahura kugwana yimaliva yepangero. Nkenye apa tuna kupurako awo kapi avatupakere sinka kututra tupu. Mukaro kapi guna wapa oku. Unene vanasure vakare asi vakodni vawo kapi tavavhuru kutuma yimaliva oku, hawe kuna kumona kanyando. Yimo ana kutanta gumwe ogu nage ana kumona kanyando kangesi. Yipo nye asi siruwo esi awo kuna kuruganesa nye nofunguna vagave runyegenyo rwawo. Kapi tuna hara ekohonono litunde kepangero. Ose eyi tuna hara kutengura kosirongo setu, morwa mukaro gwangesi hawe kapi natukagutambura hena. Kapi tatu heap ngesi ngwendi oku twatunda kwato mambo. Vamwe kuna kuhundira vakurona vawo vavarandere noticket dokurondesa dira vatengure. Awo kuna kara asi nopassport daw okapi vana kara nado ntani kwato yimaliva yokurondesa dira. Ako hena kapi kwakara ekuma ndi darate vantu kuyagendagura pevango masiku eyi yina kureta woma kwawo. Awo kavatente asi ngesi kuna vatamba kwedi oko vatjange makonakono, kapi vaa diva omu navalironga awo kwato nombapira. Gumwe gwawo katente asi kapi yina kumoneka nawa orande mfewa nye vakweni awo kuna kuhepa. Ministera Gerongo lyepeguru, Dr. ItahKandji –Murangi kapi kadivireko Yuma keroyango kalihorokere, nye katumbwidilire kuyikwama atare asi yinke yinahoroka. Nye kwakara asi nsene muntu tokalirongera posirongo peke kukarako maudigu gokulisiga siga. Nye maudigu gamwe gayasika nare komberewa zange yimo ana kutanta. Ntani age kapi gadiva asi vanamberewa yiwo avapungura nopassport dovarongwa. Ngodji funguna zendi kazidimine apa katukondjere asi tumugwane. Sayitunga zaNew Era kapi katugwene mukarelipo gwaNamibia mosirongo sina ndi asi moCongolesse, nofunguna dawo kadi kere dina dimi. Munamberewa gwaNamibia moCongo, katente asi mukarelipo kurona Nghifindaka ngesi mweli mosirongo ndi asi moNamibia.