Kansela gomukunda Oranjemund Lazarus Nangolo, katente asi vaSWAPO vakwawo yiwo vana kuzonagwisa yirugana yendi omu vana kumuvarwira asi kansela goudwa, ogu ana kara asi dogoro papa kwato eyi garugana asi ngano aretesepo ekuliko momukunda gwendi ogu vamahorowera. Apa nye kakere tavamupuragere, wosayitunga zaNew Era, nage kapi kakere asi alisigilire, nage kahomokerere vaSWAPO, vakwawo asi kuna kara tupu negano lyokumupa efano dona, omu vana kuuyunga asi kutunda tupu apa gatameke sirugana esi kwato garuganako. Nokupura nye asi pwamwene omu ana kugazara yinke garuganako, ntani nsene asi nage gamona nombudi edi vatuma kupitira monofunguna omu vana kutanta asi age udwa ntani kwato eyi garugana.
Age kalimbwilire nelisingo nyeko asi gamona nombudi dangesi, nye age kuna kuyigazara asi edi nombudi dina kutunda kovakwawo zendi womombunga zendi zaSWAPO. Edi kuna kara nombudi edi vana wapayike. Owo kuna kara tupu vakwetu vaava twarumbasanene nawo mokugwana evango eli, yimo ana kutanta. Age katente asi gavadiva vantu ava vana kutjanga nombudi dangesi, ntani kuvhura kuvatumbura komadina. Owo kuna kara tupu vakwetu mombunga zetu ava vakere nawo negano asi vakare vakansela nye kapi yavawaperere. Ano mokukwama kwamwene age garugana eyi yamuwapera ntani vatungimo sinzi sawo kuvhura vakare nombangi dendi. Age kuna kuyimona asi kwarugana yininke yoyiwa nampili wonombunga peke kuvhura vayikarere umbangi. Eli kuna kara elikwamo lyokuzonagwisa nayinye.
Yirugana yange kuna wapa, yipo nye asi owo vana kuuuyunga yangoso hawe kapisi wokoure womombunga zetu, nsene opura wonombunga peke dogoro papa awo kuna hafa unene kweyi nina kurugana. Nangolo katente asi sitambo sendi ngesi kuna kara asi gahepa kukara pevango eli navavhura kumugwana noureru. Age sinkwa ntani tupu kakapatwilire mberewa zendi ndi asi zomukunda moRosh Pinah, negano asi vantu wonoRosh Pinah vahagenda sinano sosire morwa kuna hara kuza komberewa zaKansela koOranjemund. Simpe age katente asi maudigu moyrugana ntani epiro yirugna kuna kara udigu ou vana kumona ngesi, vantu kuna kuwiza komberewa zendi nkenye ezuva vayarapote eninkiliromo kovagavi yirugana ntani epiro yirugana. Eninkiliromo varugani kuna kara simwe esi sina kukara nkenye siruwo momukunda gwina. Vamwe vagavi yirugana kuna kutara varugani ngwendi nayimwesi, morwa varugani kuna kumona kanyando yipo vana kugusa nkenye eyi vana vape agwane eparu, vagavi yirugana ngesi kuna kara nelikwamo asi yirugana oyo gusa ndi siga kukwama kwanyamoge.