Auleria Wakudumo 

Omulumenhu weedula 49 okwa tulwa moipandeko eshi vati a twa nokudipaa omukainhu waye komesho yainamweno momukunda Omanyanga moshitukulwa shaShikoto. 

Omupopiliko wopolifi moshitukulwa shaShikoto, Chief Inspector Ellen Nehale-Kangulu okwa holola kutya oshiningwanima eshi osha ningwa Omaandaxa lwopotundi 14h00, sha ningilwa poundingosho vopomukunda Omanyanga. 

Nakufya okwa tongololwa oye Kristofina Hainyanyula, omukalimo womomukunda Omanyanga. 

Otaku hokololwa kutya omufekelwa oo ita tumbulwa kedina omanga ina holoka momhangu okwa hanga vati omukainhu waye ve li naina poundingosho. 

She likolelela keedombwedi odo da li po, vati omufekelwa ina popya nande oshitya shimwe nomukainhu waye. 

Okwa nhipula mo ombele ndele ta hovele okutwa omukainhu waye oikando ihapu monhulo nokombuda. 

Otaku hokololwa kutya omukainhu okwa xulifila poshiningwanima opo. 

Otaku hokololwa yo kutya ovalihomboli ava vavali va kala nokulihepifafana nova li tava ka holoka komesho yomhangu yOshiwambo koomwene womukunda Omanyanga ngefiku la shikula ko. 

Omufekelwa okwa tulwa moipandeko konima yoshiningwanima nokwa teelelwa a holoke momhangu nena. 

Oshiningwanima sha yooloka, omulumenhu weedula 35 ota mono epango lopaunamiti moshipangelo shaNandjokwe eshi a tuwa vati nombele metako nokudengwa nomupini wetemo kumumwainamati weedula 32 oo e na vati ounghundi wopamadilailo. 

Oshiningwanima eshi osha ningilwa momukunda Etilahi mOkaku, Etitatu efimbo lokonguloshi lwopo 20h00. 

Edi oda kolekwa komukulunhu wopolifi koshikondo shokukonakona oimbuluma moshitukulwa shaShana Deputy Commissioner Frederick Ndjadila. 

Otaku hokololwa nakuningwa oshihakanwa nanakufekelwa va pambafana ongovamwainamati nohava di meumbo limwe. 

Opolifi oya holola kutya omufekelwa vati okwa twa mumwaina metako nombele ndele te mu denge vali nomupini wetemo momutwe oshikando shimwe. 

Nakuningwa oshihakanwa okwa mona oshiponga vati komatako nomomutwe. 

Otaku hokololwa vati omufekelwa a kala nokuningila mumwaina pamwe novaneumbo vamwe omatilifo oku va dipaa oule wefimbo.

-wakudumoauleria@gmail.com