Festus Hamalwa
Omukainhu weedula 29 okwa hupa moshiponga shelikufomwenyo, shaashi vati kaume kaye kopaihole a kendabala okuxulifa po ekwatafano lavo. Oshiningwanima eshi osha ningilwa Etivali modoolopa Opuwo moshitukulwa shaKunene meumbo lomulumenhu waye lwopotundi 23h00.
Opolifi oya ti omukainhu oo kwa li ta kendabala okulidipaa nomiti doudiyo paife oku li moshipangelo omo ta mono ouhaku nexungomwenyo. Va ti omunyasha ou hanga okwa fya shaashi ina hangika e li monghalo iwa. Omukonakoni woimbuluma wopolifi moshitukulwa shaKunene omupedu Commissioner Paavo Iyambo okwa hokolola ta ti omulumenhu oo okwa lombwela omukainhu konima yefiku limwe kutya ine mu hala vali.
Mefiku loshiningwanima, omukainhu vati okwa ya keumbo lomulumenhu waye efimbo lokonguloshi ta ti okwe uya op ova popye. Vati omulumenhu okwa kala e li mosheti ta tale oTV. Konima yefimbo okwa ka ya konduda yokunangala oko a hanga omukainhu oo e li pombete a nangala a ka lelwa koukenda vavali vomiti, ovo vati kamwe kali ka pwa.
Omulumenhu okwa dengela opolifi diva. Omunadolongo e li mangeleka eshi vati a pewa oikulya ishona Omulumenhu weedula 47 okwa fya eshi vati e limangeleka shaashi vati a pewa oikulya ishona.
Opolifi oya ti omulumenhu ou okwe limangeleka noshilapi shekumbafa monduda yokuwapalekela. Oshingwanima eshi osha ningila mokakuma poshitaashi shopolifi modoolopa Keetmanshoop efimbo loufiku.
Nakufya okwa tongolwa oye Paul Cloete omukalimo womoKeetmanshoop. Omukonakoni woimbuluma wopolifi moshitukulwa shaKharas omupedu Commissioner Nicodemus Mbango okwa hokolola ta ti Cloete okwa li a ya komhangu efiku olo eshi kwa li a ka pwilikina oshibofa shaye shoumbudi woimuna.
Vati eshi a fika okwa pewa oikulya novanadolongo vakwao ashike vati okwa kala ta nyenyeta ta ti kutya okwa pewa oikulya ishona. Opolifi oya ti efimbo longula eshi omunadolongo umwe a penduka a ka wapaleke okwe li twa Cloete a fya e li meemhango moshitenda shokapomba. Ovakwapata vaye ova shivifilwa efyo laye nomakonakono opolifi otaa twikile.