Auleria Wakudumo 

Omukainhu omufiyekadi weedula 40, omukalimo womomukunda Ohaiyanda moshitukulwa shaShikoto okwa holola eudonai eshi alushe ta pulwa a fute oN$15 opo a pewe oshikukuta, ye vali oha kufwa odooxa yoshi, ya weda kofuto. 

Kakele keefuto odo, Foibe Lucas okwa hokolola yo ta ti okwa kufwa eendongi daye, epya noinima aishe meumbo konima eshi omusamane waye a xula ko mo2022. Ta ti omahepeko oo, otae mu ehameke unene shaashi okwa anya okudja peefya domusamane waye. 

“Ngeenge onda kala ndihe na oN$15 odo handi pulwa nena itandi pewa oshikukuta shange fiyo handi twala ko oshimaliwa osho,” Lucas ta ti. 

Okwa hol ola ta ti okwa lombwelwa kutya oshimal iwa osho ha pulwa ohashi pulwa yo ovanamukunda vakwao opo va kwate oshikukuta. 

Ka kele koku futila oshikukuta, Lucas okwa weda po ta ti mwene womukunda wavo okwa kufa ko vati eendongi heyali odo omusamane waye a li e mu fiila. 

“Odula ya dja ko ova li va kufa po nhee ndele hatu kala inatu mana okupulula. Eendongi nhatu, ove ya oku di shinga mekove omanga di li meumbo. 

Eendongi adishe vati oda twalwa komukwaniilwa kouwa. Otwe ke lihanga hatu papula shaashi oimuna ya ya,” Lucas ta ti. 

Lucas ove na ounona vanhe nomusamane waye, oukadona vavali noumati vavali ve na eedula okudja 12 fiyo nhano. 

Lucas okwa ti omusamane waye okwa kwatwa kounghundi muMai 2022 ndele ta xulifa muJuni omudo oo. 

“Omanga omusamane wange ina xula ko, otwa li twa landifa onhele i li kekove komusamane umwe molweemhumbwe detu. 

Paife okwa wedela ko konhele oko twa li twe mu pa ashike inatu udafana naye. Odalate onda li nde i kufa ko ndele te i shuna ko,” Lucas ta ti. 

Mwene womukunda Ohaiy anda Johanne s Shigwedha okwa holola ta ti Lucas iha futifwa vati nela lakano lokupewa oshikukuta ashike ohava futu omusamane Petrus okueta oushako voshikukuta popepi navo, poundingosho hava ifanwa Ethindi. 

“Shaashi oshikukuta ohashi tambulilwa kosenda kokule, ovanamukunda ovo vene va lilila tate Petrus e va kwafe opo eshi ete pounduda vavo apa popepi shaashi oku na osheendifo. Ovo vene va udafana okufuta N$15 okufuta omahooli ovanhu,” Shigwedha ta ti. 

Nande ongaho, Shigwedha okwa ti ope na natango ovo ihava dulu okufuta oshimaliwa eshi nohava yi kosenda va ka humbate oushako wavo. 

Eshi mwene womukunda a pulwa eendooxa deeshi daLucas odo vati hadi kufwa po okwa nyamukula ta ti okwa pula ava hava topola oshikukuta ashike kape na ou ha kufa po oikulya yaye. 

Mwene womukunda okwa weda po ta ti vati ova kufa po shili eendongi nhano shaashi vati kada li domusamane noda twalwa kelelo. 

Shigwedha okwa indila ovanhu opo va pul e ouyelele keembinga adishe manga inava tula oinima komalungula. 

“Onda uda nai kwaasho sha tulwa komalungula kuLucas ashike ondi na okutwikila  okuyandja omakwafo mwaasho a pumbwa ngaashi oufemba woshilongo waye mwene nowounona vaye,” Shigwedha ta ti. 

-wakudumoauleria@gmail.com