Rundu – Vaporosi moKavango zoutekero moutatu una puko kavagwanekerere nombudi zondona omu kavagwene simpu somugara ana dogoroka ntani sina zonauka unene, simpu esi kavasigwene vantu ava kavazire vakapapare nongombe dawo kadizumbanene mevango lya Mbeyo eli lyakara asi lyompongasano omu ava zangura yikaramo. Egwano lyosimpu esi kwahorkere mouvali koyiha yono vili 07h0. “
Mokukwama vagara ava vavali kavagwene simpu esi sokuzonauka, apa tupu kavasikire pepi nombwa dawo taditameke kudukagana oku tadifumbwire eyi kayitwarederere dogoro vagwane asi apa yisupa yomuntu yina karapo; awo poopo yipo nye kavadivisireko vaporosi konomfa edi dahana divilisa domoufwandi tupu ngoso, makura awo yiyo nye kavatwere vaporosi pevango olyo vana gwana Yuma yangesi” yimo nye ana kutanta muporosi kurona ogu gakarerapo makona kono komisaragona Rudolf Mbumba, ogu kayinkondopekere kosayitunga zaNew Era.
Vaporosi kuna kuhundira vatungimo momukunda gwaMbeyo ntani nomukunda dakara pepi vawize vayadimburure nakufa ogu kutara koyikoverero eyi kadwere, ndi nkenye kumwe ogu ana diva asi vazumbanesa gwawo vawize vayadimburure gwawo ogu ana kara asi kapi kagendere noyidimbwilisa yongandi. Vaporosi kavatente asi nakufa ogu kadwere embare lyosinauguru, mburukweva nazo zosinauguru zogina, jekete vatjanga Redbat noyikapute vatjanga Adidas yoyisovagani ntani vili nye vatjanga Redbat. “Kuna kumoneka asi muntu ogu walye kwadogoroka makwedi gatatu gana kupita, kuna kumoneka asi age kahingilire nampo apwizumukepo makura mokupwizumuka age kapi hena katundirepo opo kahingilire. “ Yikoverero yendi simpe yiwaawa kuvhura kuyidimburura nsene asi koveli vane koro vana kupapara gwawo ogu gazumba nye dogoro ngesi kapi gamoneka” yimo ngoso ana kutanta. Ano vaporosi nawo kapi vana kara noudivi asi kweli muntu gazumbana. Nakufa ogu simpu sendi kavasigwene asi age kapwizumukire morwa yisupa yendi kuna kara mositji opo ana kumoneka asi kahingilire mojakete zendi zousinaguru.
Eyi kayitwarederere nomfa dogoro ngesi simpe kapi vana yidiva, awo kuna kukambadara mokugwana ekoro lyndi ndi vamwe vana diva asi kweli kazumbanene nye dogoro ngesi kwato yina kumoneka ngoso, yimo ana kutanta Mbumba. Yisupa yana kufa kavayitwere nye kokira zepangero moRundu. “ Ose kuna kuhundira vatungimo momukunda gwaMbeyo nonomuknda dakundurukida asi vawize vayadimburure muntu ogu kupitira moyikoverero eyi kadwere ndi nkenye ogu tupu ana kara nombudi asi gwawo gumwe kwazumbana yipo asi tuyadimburure muntu ogu kadogorokere momukunda gwaMbeyo mowiza tupu ngoso. Yimo ana kutanta pokuhulisa Mbumba.