Auleria Wakudumo
Opolifi moshitukulwa shaShana oya tula ovalumenhu vavali moipandeko konima eshi vati va ponokela nokuteya eumbo laMayola wodoolopa yaShakati Leonard Hango.
Omufekelwa wotete, Hendrik Paulus weedula 31 okwa mangwa po tete, sha landula eshi ovapolifi vaShana va ya mokashoko fiyo a kwatelwa komukunda Onghumbula moshitukulwa shaShikoto.
Omanga omufekelwa mutivali Shiindi Paulus eya okukwatelwa popepi nOngwediva. Ovafekelwa ava ova holoka komesho yomangu yaMangestrata waShakati notava kala moipandeko.
Omukulunhu wopolifi koshikondo shoku kona kona oimbu l uma moshitukulwa shaShana, Deputy Commissioner Frederick Ndjadila okwa holola kutya oshiningwanima eshi osha ningwa pefimbo lomatango manene, omanga mayola ehemo meumbo.
Ndjadila okwa holola kutya eumbo olali tali fiilwa oshisho komutonateli womaliko oo a kutwa a takamife eumbo laye oule womafiku eli omulongo.
Otaku hokololwa mayola a dengelwa ongodi kukaume kaye, temu shiivifile kutya opena otuwa yafa yaye tai landifa oinima molukanda oyo yafa ya vakwa.
“Shaashi mayola okwa hangwa ta shingi pokati kOndangwa nOshakati, okwa endelela a fike keumbo laye opo a tale ngeenge otuwa yaye oyo ya faafana naai tai tongwa omo ili meumbo. Mokufika, okwa hanga eumbo laye la tewa notuwa ya iwa nayo,” Ndjadila ta holola ngaho.
Mayola vati okwa hanga eumbo laye la patwa, nomutonateli womaliko oo ali a fiya po, eheshiivike kutya okwa uka peni.
Ookalyamupombo ova kufa mo omaliko ena ongushu I fike poN$832 100, mwa kwatelwa otuwa yoLand Cruiser V6, eendjebo nhatu, okandjato komaufemba aye, okandjato kokombuda kena oimaliwa ikukutu ya fika poN$5 600, oikutu, omawigi okomutwe, eelaptop naikwao ya wedwa po.
Opolifi oya pondola yoo okumona imwe yomomaliko oo ali a vakwa meumbo, mwa kwatelwa eelaptop, oradio yomotuwa, oikutu neenghaku, omaadi okwulishasha, ondjebo naikwao.
Opolifi oya holola kutya natango oili mokashoko okukonga oinima imwe oyo inai monika natango.
Olopota yopolifi oya holola kutya eteyo lomaumbo ola li la lundalala pefimbo lomatango omanene, okuya mokrismesa fiyo omudo mupe moshilongo ashishe.
-wakudumoauleria@gmail.com.na
