Ovalumenhu vavali ove li mangeleka mefiku limwe neudo koshitukulwa shaHangwena Olomakaya. 

Oonakufya ova tongolwa ovo Elia Namundjebo weedula 25 a dile komukunda Omufitu Wekuta omanga umwe oye Job Haimbodi weedula 56 a dile komukunda Omhedi. 

Omupopiliko wopolifi moshitukulwa shaHangwena Warrant Simeon Haufiku okwa koleka oiningwanima ei yomalikufo eemwenyo. 

Opolifi oya hokolola tai ti Namundjebo okwa dja meumbo efimbo lokomatango ndele ta tumine umwe womukwapata waye etumwalaka kongodi kutya okwa hala oku li mangeleka. 

Ota ku hokololwa kutya okudja opo ovakwapata ova ninga onghendabala yokumukonga fiyo te li tuwa e li meemhango. 

Okwe li tuwa koshi yomuti mekove lambulavo. Opolifi oya hokolola tai ti Haimbodi okwe li tuwa kovaneumbo vaye e li meemhango monduda yaye yokunangala. Oonakufya aveshe ina va fiya po omukanda tau yandje ouyelele kombinga yomafyo avo. 

Okwa didilikwa ovalumenhu va ninga oihakanwa yokulimangeleka osho shi li tashi limbilike unene. 

Opolifi oya kumaida oshiwana opo shi kale tashi ka konga omakwafo kovaxungimwenyo osho yo kovafitaongalo shaashi oku li kufa omwenyo ka kushi ekandule po lomukundu. 

fhamalwa@nepc.com.na