Rundu –venekoro lyogu varioya vaporosi vaNamibia gonomvhura 34, Joseph Kautjingu momazuva 17 Nsinano kavageve mbapira zawo zorunyegenyo kwanguuru gomukunda Kavango zoupumezuva, omu vana hara elimbururo litunde kovaporosi vaNamibia womukunda Kavango zoupumezuva, ava vana kara dogoro ngesi kapi vana kugava ko uzera nkenye kuhamena ehudi eli.
Ekoro lyana kufa ava kuna kuruganesa muhahende Bernhard Tjatjara mokupitira mwendi omu ana hara asi vagave nombudi nadinye kuhamena ehudi eli, eli lyahorokere mo 3 Nsinano apa vaporoisi vakere nefukunyo dogoro vakadipage Kautjingu.
Pomuhowo vaporosi kavatente asi nakufa kwamugazarera asi gumwe nage arandesa yipapa yankaka. ‘’ Omu nye tuna hara kuliwapayikire yipo tukakarerepo muntu gwetu, ose kuna hara nye mutupe mauzera aga gana kukwamako, yipo asi tuyirugane moomu yawapera,’’ yimo ana kutanta Tjatjara mombilive zendi gatjangera vaporosi sivike sina puko. Vaporo awo nare valimburura asi mauzera gangoso kugagwana komunamberewa ogu vana kutumbura asi control prosecutor kapisi vaporosi.
Nakufa Kautjingu, ogu vayahoreka momazuva 18 Nsinano, kwadogoroka koyironda, age kwakamugwana asi ana dogoroka paapa tupu gakasika kosipangero sepangero saRundu. Vanekoro awo kuna kutanta asi mezuva olyo, ehauto lyovaporosi gasingire const Immanuel Kasera kwawizire liyadamune nakufa, pevango olyo arandesa nyama, awo kwavamwene po mile 20 moKavango zoutokero koyiha yovili 20h00.
Konyima tupu zovili zimwe, vanekoroi tavagwana mbudi zoruguwo asi Kautjingu vana muroya vaporosi ana dogoroka. ‘’ Age kwakere gokutjilisa ndi ngapi, ndi nampo nage kwakere nouta wendi ou una kara asi kuna kutjilisa yiyo vamuroyera? Vanekoro vana hepa umbangi naunye, ‘’ yimo zina kutanta mbapira zawo zorunyegenyo.
Vane koro simpe kuna kupura asi morwa sinke sikutji kasiyukilire poyiha yonturo vahana kumuroya momaguru, ntani yinke kavamuroyerere ruvali. ‘’ Mokukwama vaporosi asi nakufa kahere kuduka. Nsene asi usili, ngapi ngapi sikutji kasimukwete posipepe pomaligwanekero yahana kumukwata konyima? Vanekoro kavavatanterere asi age kavamudipagere morwa kakere nosipapa sankaka.
Sipapa sankaka mulyo unene kupitakana eparu lyomuntu? Yimo vana kupura.
Vanekoro simpe kavapulire asi morwa sinke vaporosi kavahamenenemo kapi vana vakwata? Vanekoro kun ape nye ngesi vaporosi mazuva 14 vakwate owo kavahamenenemo.
Apa nye kavatambwire mbapira ezi, nguuru gomukunda Kavango zoupumezuva Bonifatius Wakudumo kageve nonkango dendi druguwo mokuhengayika vanekoro nokuvatantera asi age nasikisa mbapira ezi oku zina tamba. ‘’ Ame kuna kuna kumupandura morwa kutunda tupu apa sahoroka simpagwa sangesi kapi mwaligusira veta kononkondo.
Kulyatera mulikide runyegenyo rweni kuna kara eyi lyamupulisira ediveta omu muna kuhunda owo yina tamba vamupe eyi yahoroka.
Ntani one kwahuguvara unene ngendeseso zetu zopaveta yahepa kusikamo, yimo ana kuhundira ngoso nguuru. jmuyamba@nepc.com.na