EENHANA- Omupresidente wongudu yoPDM Mchenry Venaani okwa udaneka oku yandja omweva meumbo keshe lomoshitukulwa shaHangwena ngeenge okwa hoololwa. Venaani edi okwe di popya Olamakaya pefimbo a ninga oshikonga kEenhana.
Venaani okwa ti oshitukulwa shaHangwena osho shimwe sha taalela eshongo linene lomeva.
Venaani okwa li ta ende nomalukanda kEenhana nelalakano lokuxwaxwameka oshiwana shi ka hoolole PDM.
Ovanhu va dja koitukulwa ya yooloka ova tutwa neebesa okukala va fika kEenhana.
Osoondaxa, Omupresidente woPDM okwa li yoo a ninga oshikonga kOmuthiya koshitukulwa shaShikoto oko nako a lombwela oshiwana kutya ngee a ningi woshilogo woshilongo ota ka kandula po omhumbwe yomeva noyomonooli.
“Omeva okwa fimana. Itashi ulike efano liwa ngeenge oshiwana tashi nu omeva aka ka,” ta ti.
Okwa ti okudja omudo 1990 ovaleli voSwapo ova dopa okukala va kandula po omhumbwe yomeva mOhangwena.
“Ngeenge owa yi komikunda oto hangeko vanhu tava ende oshinano shile tava shingi eedongi daumbata omeva,” ta ti.
Venaani okwa lombwela oshiwana opo shi ha ninge epuko okuhoolola Swapo molwashi ke na eshi a ninga po okuyambidida oshiwana.
“Otu na ovanafikola tava mono oixuna vehe na oshimaliwa shokuya koiputudilo yopombada. Momudo tau ya ondi na okuninga elunduluko la kula okuyambidida ovanafikola,” ta ti.
Okwa popya ta ti moshilongo omu na ovanyasha vehe na oilonga noshoyo oumbudi wa londa pombada. “PDM oyo ashike ongudu tai dulu okuyandja oilonga kovanyasha. Ohandi ka yandja oshimaliwa kovanyasha opo va tote po eengeshefa davo,” ta ti.
Okwa ti ota ka tunga eepate doshinanena komikunda nokukala a yandjaneka olusheno. “PDM ongudu ihe na okatongo molwashi otai lelwa komunhu e na oukumwe. Ohandi ka yandjaneka omayakulo koitukulwa aishe pehe na oulingilingi,” ta ti.
Venaani okwa ti okwe li longekida okukala a ninga Omupresidente waNamibia nokukala a lwifa ondjala noluhepo.
“Ka pena omunhu ta ka fya ondjala. Ovanhu otava ka pewa oikulya yoshikukuta omwedi keshe pehe na omangabeko,” ta ti.