Ehangano lokutunga omaumbo ola tungila ovakwashiwana vomOndangwa omaumbo e li o24 moshitukulwa shaShana.
Eshi osha ningwa konima yeedula 12, eshi ovakalimo vaNdangwa ve lixulile okupewa omaumbo ko-NHE e li omulongo vati mo2011.
Ominista yomayambulepo eedoolopa noushayi Erastus Uutoni pefimbo a li ta yandje omaumbo mape koovene okwa ti, Ondangwa odoolopa yakula notai dulu okulonga xwepo shaashi vati exumokomesho otali shololifa ovanhu neenghono. Okwa ti elelelodoolopa ngeenge tali yandje edu, alushe nali yandje kondado i shi okulidiinikilwa, opo ashike ovamoni voiyemo yopedu navo tava dulu okulanda ile okutungilwa omaumbo kehangano lokutunga omaumbo NHE.
Uutoni okwa ti edu olipu ashike okuyandja nokutunga ngeeenge la yandjwa kondado i li xwepo kelelo lodoolopa.
Okwa lombwela ovakwashiwana va li poshitufi kutya NHE osho yo elelodoolopa vamwe aveke, voo aveshe oilyo yepangelo, nohava kwafele ovanhu aveshe. “Ngeenge nena otwa longele kumwe noilyo ei, ovanhu vahapu otava ka kala komukweyo wokutyapula omauwa omaumbo,” Uutoni ta ti.
Okwa twikila kutya nonande vati momusholondodo wonduba yovanhu va pumbwa omaumbo va kufa mo omaumbo e li 24 oo tau ulike ashona, vati okwa kwafela eefamili di li 24.
Ovanhu ava paife ove na apa tava tenheke omitwe davo onghalamwenyo aishe, loo eumbo eliko limwe lakula lomomaliko akula nove li tala ko ongoshinima shi na ongushu.
Uutoni okwa yelifa yoo kutya omaumbo aa e li momulandu wokulandifa nao okwa hovela nale okulandifwa nokuli, novakwashiwana ova manguluka okulanda. Okwa ti nonande e uditile ombili elongelokumwe na-NHE nelelodoolopa tali ende nawa, natango ke udite ombili eshi odoolopa yakula ihe na eepoloyeka di li metifa tadi dulu okuvatela ovanhu.
“Ondangwa odoolopa yakula, noya idilila ovanhu veengudu dihapu. Ohandi indile mu ete po eepoloyeka edi tadi dulu okuvatela ovanhu, noku va kufa moluhepo, Uutoni ta ti.
Uutoni okwa ti okwa hala okuufana NHE pamwe nelelodoolopa laNdangwa kombelewa yamayola opo ve linyike komilungu, voo va fye oshisho kutya ova tula po omilandu opo ovanhu va dule okupewa edu lokutunga omaumbo e li kondado tai dulu okulineekelwa.
“Onda hala yoo okupula omalelo opamufyuululwakalo a twiki l e nokulandifa edu kondado lela i shi okulineekelwa, opo omaumbo aa taa ka tungwa pedu a dule okulandifwa kondado i li xwepo,” Uutoni ta ti.