Omu ku lunhu wehang ano lomashenge moNamibia Wendelinus Ndiwakalunga Hamutenya- Jeremiah okwa hokolola ta ti okwa dengwa nokumonifwa oshiponga kovalumenhu vatatu shaashi vati e kwetele oushenge komesho.
Oshiningwanima osha ningwa Omaandaxa efimbo lomutenya pendiki lomangeshefelo limwe moWindhoek.
Hamutenya-Jeremiah okwa hokolola ta ti tete ovalumenhu ova denga ekende lotuwa yaye nokonima eshi a dja mo motuwa ove mu nukila noku mu kwata pofingo ndele tave mu lafa oupuka.
“Ovalumenhu ova ti kutya ova tumwa va denge nge shaashi ame eshenge. Ova lombwela nge tava ti kutya ova uda minista womidingonoko nomatalelopo Pohamba Shifeta ta popi ta ti kutya omashenge naa dengwe needibo,” ta hokolola.
Okwa ti okwa dengwa neengonyo nomanghava noshoyo nomamanya komaulu.
Hamutenya-Jeremiah okwa ti okwa ya koshipangelo opo a ka konge epango lopaunamitia ashike paife oku li keumbo laye. “Paife kandi li vali meameno, onghalamwenyo yange oi li moudjuu. Inandi manguluka vali ngeenge handi i mokati kovanhu molwaashi ovanhu ova pewa oufemba wokudenga omashenge,” ta hokolola.
Okwa ti oha ningilwa nomatilifo kutya ota dipawa eshi ha tuminwa omatumwalaka kongodi yaye.
Hamutenya -Jeremiah okwa ti ota patululile minista Shifeta oshibofa molwaaoshi vati ote mu fekele kutya oye ashike e na okukala a unganeka ovalumenhu ovo ve mu denge.
Okwa weda po ta ti Namibia oshilongo sha manguluka onghee omashenge nao oku na oufemba wokukala a manguluka ngaashi naana ovanhu aveshe.
Kuyele oshivike eshi, Shifeta okwa popya moukwatamawi ta ti ovalumenhu nava ende needibo va denge omashenge ngeenge tae va piyaaneke.
Shifeta okwa patululila Jeremia Mushunina oshibofa oo vati oye e li odjo youyelele oo wa kakeka edina laye kutya naye eshenge.
“Ame omuleli, ashike ondi na ounona. Ondi na memeona umwe a ombokelwa eshi a uda oshiima osho…”
Shifeta okwa ti ngaho, mokuholola eudonai molwaedina laye la tulwa momusholondodo wovanhu ovo vati omashenge moNamibia.
“Paife ounona vange otava kala tava shindwa kofikola kutya xe eshenge,” Shifeta ta ti.
Shifeta okwa ti okwa hala Mushunina a holoka momhangu opo a kale a hokolola kutya okwe mu mona peni kutya naye eshenge.
“Ame Mushunina kandi mu shi, inandi shakena nale naye,” ta ti.
Shifeta okwa ti mexuliloshivike okwa dengelwa ongodi kuMushunina te mu lombwele kutya ota lundilwa vati ine shi popya shili kutya ye eshenge.
“Okwa ti nandi mu file onghenda shaashi ota lundilwa ashike. Ame onda mona okavidio ta popi nge komalungula kutya naame ondi li moshikumungu shomashenge,” ta ti.
Shifeta okwa ti okwa hala Mushunina a kale a kwatwa po diva molwaashi okwe mu lundila.
“Okwa kakeka edina lange moshiwana, okwa lundila nge shaashi ame kandi mo moshikumungu shavo shomashenge,” Shifeta ta ti.
Edi Shifeta okwe di popya Etivali meenghundafana va ninga naKundana omo a hokolola ta ti itashi ulike efano liwa kounona vaye nokovakwapata vaye eshi taku tiwa naye eshenge.
Okwa weda po ta ti itashi ulike yoo vali efano liwa kOvanamibia ongaminista, omuleli wopapolitika ndele eshenge.
Omunamido 42 Mushunina okwa ti ota lundilwa, vati ina popya kutya minista Shifeta naye oku li moshikumungu shomashenge.
“Paife ohandi kwatwa po kopolifi molwaashi nda lundilwa. Ame onda ti eike moshikumungu shomashenge omu na eeminista mbali ashike inandi popya edina laShifeta,” ta ti.
Mushunina okwa ti Shifeta ote mu ningile omatilifo molwaashi e wete kutya oku na oimaliwa yokuya komhangu, ye ominista.
fhamalwa@nepc.com.na