Kansela woshikandjohoololo shaTamanzi Johannes Iiyambo ota ti onghalo yoshikukuta neudo oya eta ovakwashiwana vahapu va dengwe kondjala molwaashi inava likola mo sha momapya avo.
Okwa ti oshiwana ohashi kala alushe sha ngudumana pombelewa yaye tashi pula oikulya ashike mombelewa ihamu kala oikulya yokuyandja koshiwana.
“Omafimbo amwe ohandi longifa oshimaliwa okudja mondjato opo ndi dule okulandela oshiwana oukutu voufila,” ta ti.
Kansela okwa weda po ta ti oimuna nayo oya ninga oihakanwa yokudengwa koshikukuta.
Okwa didilikwa oshiwana momikunda dihapu monooli tashi kwena ondjala efimbo keshe omanga vamwe ohava i pombete nomandjandja taa kwena oumbwena molwaashi kape na oikulya.
Ookansela voikandjohoololo ya yooloka navo ova lulilwa koshiwana hashi kala sha ngudumana keembelewa davo tashi kwena ondjala.
Pefimbo Kundana a talela po oshikandjohoololo shaTamanzi ovakulupe ova ninga oihakanwa yokupitila eengula keendingosho tava ka nwa otombo molwaashi momaumbo kamu na oipalwifa.
Nonande ovakulupe hava kwata oshimaliwa shopendjela, inashi wana okulanda oikulya momaumbo molwaashi omaumbo amwe oku na ovaneumbo vahapu.
Lea Hafyenanye weedula 57, womomukunda Amarika okwa hokolola ta ti neudo mepya laye okwa mona mo ashike eelata mbali doilya.
Onghee okwa ti inadi va wanena novaneumbo vaye ve li 10 mwa kwatelwa ovatekulu vaheyali.
“Ihandi kwata opendjela onghee ihandi dulu okulanda ekutu loufila. Ounona vange ohava dulu okuninga nande omafiku avali inava lya shaashi meumbo kamu na oilya,” ta hokolola.
Okwa hokolola ta ti omafimbo amwe oha xupu movashiinda shaye have mu pe okakutu koufila ashike ihaka kala po.
Hafenanye okwa ti oha xupu ashike motombo ngeenge a fiilwa mo kuvakwao keendingosho ile ngeenge a landelwa oupana.
“Ihatu pewa oikulya yoshikukuta. Ohatu dengwa kondjala onghee epangelo nali ninge eenghendabala dokweeta oikulya yoshikukuta keembelewa dookansela,” ta ti.
Omunashipundi welelo lopashitukulwa shaMusati, Andreas Shintama okwa ti ombelewa yaye oya didilika oshiwana tashi dengwa kondjala molwonghalo yoshikukuta.
Okwa ti ombelewa yavo oya taalela eshongo loikulya yoshikukuta inai wana okutopolela oshiwana.
Okwa ti oikandjohoololo ashike ine mOmusati hai mono oikulya yoshikukuta.
“Ovanambelwa va dja kombelewa yomuprimaminista okwa li ve lipyakidila nokuninga omapekapeko kombinga yomaumbo a dengwa kondjala noshikukuta ashike fiyo opapa inatu mona oikulya,” ta weda po.