Ongwedivas
Direktorats ǀGuru!hanagu tsî !Aub Mûǂams dis hîa Ministris ǂNamipeb tsî !Narisarimas dis !naka ra ǁnās dis, mûǂams !naka ra ǀgam xamra hîa !nurihe rasa !oa ge 32 ûitsamaxūna a !gamra ge ǂnoa!an. Nē 32 ûitsamaxūn xōǀkhā i ge donki-i tsî hā-i tsîna ge !gamhe ǂoago ǁkhâb tsî nē ǁkhâb di tsoatsoas !nâ Omalyangas ai. Omalyangas ge Omangetti ǂgari !âb Oshikoto ǀKharib dib !nâ ǁgoe. Dana Mûǂamsa ūhâ kō!gâ-aob ǀAwas ǁAegub ǀKharib dib Chrispin Konkwenab ge ge mî, nē gam !gamhe ge xamra xa-i ǀgui-e 19 !Khaitsâb dis ai tsî nau-e 26 !Khaitsâb dis ai ge ǂnoahesa, !nonaǁî-i ge 6 Gamaǀaeb dis ai ǀhao-ūhese. ǀUniga xam-i nē hakan di-i !nurihe rasa !oa noxopa hōhe tamase. Konkwenab ge ge mî, nē xamn ge Omangettis, Otayamu tyamus tsî Casablancas hâdi Oshakati ǀKharib dide a doeǂgâ!nâsa ǁnāpan ge ǀhaehe rasa !oa nau ǂhoms !nâ ra hâ xamn xa Etosha !Haosi ǀGuru!hanaba xu a sauruǂuihes khao!gâ.
“ǀGurun ge Etosha !Haosi ǀGuru!hanaba xu ra doeǂoa ǁnāpa i ge a !gomtsoatsoa !aubasensa xui-ao. Haidi ǂnabon ge ge ǁnā tsîn ge supuse nau ǀgurun xa !nūseba xu ra mûhe, ǁnā-amagan ge ǀhûhâse ra ǂgari-aihe !âgu ǁga ra doeǂoa,” tib ge Konkwenaba ge mî. Konkwenab ge ǀkhomasa ra dī, Omangettis tsî ǂnamipeb di ǀhûhâsigu ai in sîsenaon hîa ǁnā !âb!nâ !ûis !aroma mâisana ǂanǂan xam-en nî mûs karao.
!Aruǀîb ge ǁîba ǀhûhâsiga !khâikhom tsî gere mî, in ǂgōsen xamna aitsama !autsâsa xu ǁîn kai ǁkhōǁkhōsasib !nâ a ǂgâǁkhā xui-ao nē xamn ga ǁkhaubasentsoatsoao. “ǀHûhâsib khoen ge ra dītsâ nē ǂhoms !nâ ra hâma xamna ǁnāǂamsa. Nēti ī ǁkhōǁkhōsa sîsengu !aromas ge ǀō-aisa !aus ǂansa a ǂhâbasa tsîs ge ǁnā-amaga ministrisa ǁîs !ereams ase ǁkhāǁkhāǂuisa tsî ǂansa ūhâ !ûi-aona !augu !nâ nî sîsense ra sîǂui. Hoara da ra ǂgans ge, !ûisen nēti ī !aorosasib !nâ sa ûiba aitsama mâisa tsî sîsenū sida sîsenaona. ǂAnǂan re sa ǂnamipeb !nâ hâ sîsenaon tamas ka io !narima ra mâisana,” tib ge Konkwenaba ge mî. Etosha !Haosi ǀGuru!hanab ge ǀgūǁaes tsîna ǂhôan !nâ gere !nurihe kaise ǂkhawusa mâsib !nâ hâ ǁgâuǂnamib âb !aroma.