ONGWEDIVA – Omupopiliko waNamRa Tonateni Shidhudhu okwa ti okueta mo oikwakuliwa moshilongo ihe na omadina ngaashi omakoloni inaa shangwa, omaadi okulya, noshikunwa shoBest Whiskey inai pitikwa, molwaashi itai tu kumwe noveta ya tulwa po koshikondo shopaundjolowele.
Okwa yelifa ta ti unene oikulya nomaadi okulya, omakaya noshikunwa shaBest Whiskey hai kufwa moAngola nokulandifwa kOshikango neekedoolopa da yooloka monooli, inai pitikwa.
NamRa ehangano hali ungaunga noifendela yokongulu noshoyo oinima hai etwa moshilongo okupitila keembaanga.
Edi Shidhudhu okwe di popya momukanda pitifi tau yandje ouyelele nomilandu da tulwa po dokueta mo oinima yomangeshefelo naai kai shi yomangeshefelo hai dilile koilongo ya yooloka.
Okwa yelifa ta ti ombelewa yavo oya didilika oshiwana hashi eta oikulya moshilongo kai na engushulukofiku.
Onghee okwa ti osha nyika oshiponga ngeenge omunhu ta li ile ta nu oshikunwa shihe na engushulukofiku.
Okwa weda po ta ti osha fimana yoo vali ngeenge oshikulya ile oshikunwa shi na euliko kutya oikwashike ya longifwa moku shi eta po.
“Paveta oinima oi na okukala ya shangwa melaka letu lopambelewa. Omakaya oYes inaa shangwa elondodo noshoyo kae na omadidiliko ngaashi shi li sha tulwa po koveta yetu yopaudjolowele i na sha nokueta mo omakaya inaa pitikwa moshilongo,” Shidhudhu ta ti.
Shidhudhu okwa weda po yoo vali ta ti oidjalomwa yokoshi neenghaku da djalwa nale nayo inai pitikilwa mo moshilongo.
“Omahangu, oufila wepungu noufila weemboloto owa pitikwa okuuya mo inau futilwa,” ta weda po.
fhamalwa@nepc.com.na