Charles Ndeumane

Aalumentu yaali oya hulitha mOlyomakaya goshiwike sha ziko momukunda Onamatanga moshitopolwa shaMusati pethimbo yali taya hupu ondungu.

Shi ikolelela kolopota yopolisi moshitopolwa shaMusati aalumentu mboka yaali yahulitha oyali taya hupu ondungu ndjoka anuwa yi na ontopo oyindji pamwe nayakwawo yalwe.

Anuwa mboka yali komutunda oya ndhidhilike kutya omunamimvo 31 ngoka ali mondungu okwa kanitha omufudho taku fekelwa kutya omolwashoka mondungu kamuna ombepo yokufudha yagwana. 

Omunamimvo 50 Fillipus Shavuka Hango okwa kulukile mondungu opo a kambadhale ahupithe omwenyo gwomugundjuka ngoka e li omukwashigwana gwaAngola, ashike naye (Hango) okwa kanitha omufudho manga ineeshipondola okumu kuthamo. Konima yethimbo lela aalumentu mboka oyaka kuthwamo mondungu ashike oyali monkalo ombwinayi. 

Omupopiliko gwopolisi moshitopolwa shaMusati Inspector Anna Kunga okwa ti opolisi oya adha aalumentu mboka yaali yeli momwenyo ashike oyali monkalo ombwinayi lela.  Anuwa oya falwa mbala koshipangelo shaKahao hoka Hango athikile ta hulitha. “Omugundjuka omukwashigwana gwaAngola aza komukunda Eendundamo kOmbandja koAngola ngoka kwali a fa eli hwepo okwa ka falwa koshipangelo shepangelo shaShakati ashike naye anuwa okwa hulitha,” Kunga ta ti.

Oofamili yomukwashigwana natango inayi tseyithilwa natango, omanga yaHango oya lombwelwa. Omakonakono gopolisi otaga tsikile moshiningwanima shoka. –mrndeumaneraycharles@gmail.com

Caption: Inspector gwopolisi moshitopolwa shaMusati Anna Kunga.

Efano: Otwe li pewa