OSHAKATI – Aantu ye vule po200 oya li ya tameke okwiikuthila omahala kaashi li paveta mOshakati shuuninginino kolukanda Uupindi, oshoka anuwa oya loloka okutegelela.
Oshigwana osha li sha tameke okutenda omahala kusho shene, kaape na epitikilo lyelelo lyondoolopa okuza Etiyali.
Oopolota ndhoka dha tendwa odhi li moshana, ano mondjila yomeya.
Aakalimo yomoshikandjohogololo shaShakati shokuuninginino otaya nyenyeta sho ya tegelela uule wethimbo ye li momushololondo gomaindilo gomahala, taya ti, shoka osho sha li she ya undula yi ikuthile omahala.
Kundana okwa yi moonkundathana naakalimo yamwe, mboka ya gandja omanyanyeto gawo, sho ya ningi omaindilo omimvo heyali dha pita, ihe sigo onena inaya pewa omahala.
Omukiintu gumwe gomOshakati edhina lye, lyi shiwike koshifokundaneki shika okwa ti, okwa kala mOshakati omimvo dha pita 20, ihe sigo onena ina mona ehala ndyoka ta ithana lye mwene, nonando a kambadhala okuninga omaindilo melelo lyondoolopa yaShakati.
“Ano mboka ya mona omahala oyo yeni? Yamwe oya ningi omaindilo hugunina kungame ihe oya mona nale omahala. Nenge ondi na mpoka nda ninga epuko nenge inaandi gwanitha po shoka tashi pulwa?” Ta pula ngaaka.
Ta ti, okwa kala ta ningi omapulapulo koombelewa dha kansela kutya oshike itaa pewa ehala lye, ihe anuwa oha yamukulwa kaanambelewa kutya na tegelele ashike, ehala ote li mono.
“Oomvula odhu uka komeho unene, tse otwa hala omalukalwa getu yene. Aakuluntu yetu oya hala tu thige po omagumbo gawo,” ta nyenyeta ngaaka.
Esther Shigwedha okwa ti, uupyakadhi mboka okwa kala nawo omimvo ntano, sigo onena inau kandulwa po, sho osho she ya hingi opo yi ikuthile oompito ya itendele omahala kuyo yene
“Onda li nda ningi omayindilo melelo lyondoolopa yaShakati omimvo ntano dha piti, ihe sigo onena inandi mona eyamukulo lyasha, nonando yakwetu yamwe ya mona omahala,” ta popi ngaaka.
Ta gwedha po kutya uupyakadhi mboka haye ashike e u na, ihe oyendji otaya nyenyeta omahala taga gandjwa ashike kaantu yamwe.
“Otatu kala tatu futu oohiila sigo uunake? iimaliwa tatu futu oyindji unene. Omaluvalo getu nango otaga indjipala onkene itatu gwana mo we moohiila,” ta popi ngaaka.
Shigwedha ta nyenyeta kutya uupyakadhi mboka nau kandulwepo, oya hala omalukalwa gawo yene.
Omukuluntu gwelelo lyondoolopa yaShakati Timoteus Namwandi okwa ti, oye na ontseyo yaashoka tashi ningwa kUupindi.
“Oshigwana osha kutha onkatu ya puka. Aantu ihaya ikuthile omahala kuyo yene, ihe ope na oondjila ndhoka hadhi endwa,” ta popi ngaaka.
Ta gwedha po ta ti, oshigwana osha pumbwa okupewa omalongo, oshoka oyendji kaye na euveko nkene iinima yi na okweendwa.
Omupopiliko gwelelo lyondoolopa yaShakati Katarina Kamari okwa ti, elelo lyondoolopa olyi li metifa okwoopaleka oomahala gaantu mboka ye na iiyemo iishona.
“Otatu ka gandja omahala kwaamboka kaaye na iiyemo iiyamba, onkene oshigwana otashi kumagidhwa opo shi ngungumane,’’ ta popi ngaaka.
Ta gwedha po ta ti, natango elelo lyondoopa olyi li metifa okugalula oprogalama ndjoka hayi yambidhidha oshigwana okutunga omagumbo.
Mayola gwondoolopa yaShakati Leonard Hango okwa popi le kutya, nonando oyi ipyakidhila okwoopaleka nokulongekidha oopolota kOnawa, Othingo oshowo Ompumbu ya tembudhile ko aakalimo yamwe okuza momalukunda, aantu oyendji natango otaya ningi omayindilo gomahala.
“Ethano ewanawa sho aantu taya ningi omayindilo gomahala gawo yene, naashoka otashi tu pe omukumo okulongekidha etengenekothaneko ewawanawa monakuyiwa, oshoka otu wete kutya aantu oyendji oye li mompumbwe yomalukalwa,” Hango ta fatulula.
Ta ti, sigo oompaka aantu ya pita 15 000 oya ninga omayindilo gomahala, omanga ya gandja nale omahala kaantu ya pita 3 000 kOnawa.
Mayola okwa kwashipaleke kutya elelo lyondoolopa olyi na omahala ga gwana okugandja kaakalimo yawo, onkene kehe ngoka a ninga eyindilo ota ka mona ehala lye mwene.
“Onawa onene, natango oku na omahala ogendji ga gwana aantu ayehe ye li mompumbwe mondoolopa yaShakati,” ta popi ngaaka.
Hango okwa kumagidha kehe gumwe e na ehalo lyokukala e na uuthemba wevi lye mwene, a ninge omayindilo paife.
“Omayindilo gomahala oga mangulukila kehe gumwe kutya iha longo, kutya oha nyangadhala ota vulu okuninga omayindilo, shampa ashike a ndhindhilika kutya oha mono iiyemo iishona nenge ke na sha iiyemo,” ta kumagidha.
Kundana sho a li a talele po kOnawa oshiwike sha zi ko, aantu ayehe ya tembulwa komalukanda ngaashi Eemwaandi noSky, oye li monkalo ombwaanwa, oye li momahala gawo ga yela, mu na omeya nomalusheno.
Evkaapanda@nepc.com.na