OSHAKATI – Oyendji ya patelwa komeya kiikandjohogololo Uuvudhiya nOmpundja osho wo Okatyali ngashiingeyi oya ikolela ashike muutemba woondongi osho wo uuwato.

Ngoloneya gwoshitopolwa shaShana Elia Irimali okwa ti omeya oga ninga ogendji noonkondo onkene aantu itaya vulu okuza ko, niihauto itayi piti.

“Oshigwana osha kondekelwa ko komeya. Onkene otwa yambidhidha nuuwato opo oshigwana shi thike komahala hoka ya pumbwa meendeelo,” ta ti ngaaka.

Irimari okwa ti, ngula otaya tumu ko okandhakandhaka ka kaandjaneke iikulya kaantu mboka inaya mona oshikukuta.

Ta ti, omeya natango oga patitha oosikola 10 moshitopolwa shaShana.

“Oosikola odha pata pakathimbo omolwegameno lyaanona opo kaaya taaguluke omeya oshoka omale unene,” ta ti ngaaka.

Omapya gamwe nago oga yi kohi yomeya . 

Kansela gwoshikandjohogololo shOmpundja Adolf Hitler Uunona okwa ti, oondjila odha tetwa ko komeya.

“Nonando taku falwa aanambelwa yuuministeli, yamwe oya pumbwa omakwatho goondohotola kiipangelo iinene,” ta ti ngaaka.

Kansela gUuvudhiya Timoteus Shivute okwa ti, omeya ogendji unene nota kumagidha oshigwana shi kale kokule nomeya oshoka oga nika oshiponga.

“Otatu kumagindha oshigwana ngele tashi kwata oohi shi kale uupathi oshoka omeya ngoka oga etelela oshindji,” ta kumagidha ngaaka.

-vkaapanda@nepc.com.na