KATIMA MULILO –La Sunda, Mapokola mwa sikiliti sa Zambezi ba palezwi kutama sibangoki sa lilimo ze mashumi a mabeli kalilimo zepeli (22) za kupepwa, kuzwa ba amuhela piho yeo lisunda zefelile zakwamulaho, kuzwelela kubolyaminzi ba Tembamuwe, basabeyeli kwateni tokomelo ya kumutama,
Mukulubelwi yoo mazoho a hae na tamelezwi kwa mulaho na makalize kamukwa wo nakonile kutuluha mwa motikala ya mapokola ye nemata. Mapokola mwa sikiliti sa Zambezi bakonile fela kunga muhato la Sunda nako yeo taba hanesebihilwe kuyo muhulu wa sipokola sa Namibia (Inspector General), Sebastian Ndeitunga, ni haike kuli nebangile muhato, mukulubelwi natobile mwa meto a bona. Tembamuwe i fumaneha mwa sibaka sa bisholwasholwa sa Mboela wa silalanda sa Kabbe, kafoo lisunda zefelile mubalehi nasweli kungundunganya ni kusabisa bayahi ba munzi ka kubata kuba yengununa mimizo. Bo lyaminzi babali mwa sabo ba taluselize mutai wa makande wa New Era kuli neba kwaluzi taba ya kufumbelwa kuholofazwa, kutapaulwa, kono mapokola ba Ngoma mwa libiki zefelile nebali nebasakoni kuliba kwa Tembamuwe kalibaka lakuli nebasina limbayambaya. La Sunda, mukulubelwi na kaňazi mwanasikolo wa sitopa sa bulishumi (grade 10), yo nafumani likolofalo zetuna ahulu, mi musalimuhulu wa lilimo ze mashumi a silela ka lilimo ze talu za kupepwa na fumani likolofalo. Mwanako ya musihali la Sunda nako yeo mapokola haneba sa zinya-zinya kuli bazwele kwateni, mukulubelwi u akalezwa kuli na tabile mutangana kwa sifateho. Munzi wa Tembamuwe u fumaneha mwa silalo sa Nankuntwe, mi yomumwi kubao nebafumani likolofalo, na tabilwe fa lizoho, mi na zibahalizwe ka libizo la Mbeha mi muchaha ya nafumani likolofalo mwa pata nazibalizwe ka libizo la Siusiku Simasiku. Yo u kulubelwa na tamilwe la Sunda kwa ma 10 ya busihu kono na konile kubaleha mwa mota yene mushimbile kuliba kambe ya mapokola ya Ngoma.
Mapokola babalalu bene baile kwa Tembamuwe nebashimbile litobolo, ni kutama mukulubelwi yo kwa mazoho ka muhala ni kumulonga kwa mulaho wa motikala. Mubuleli wa lubasi Kluitvert Muyoyeta u ize, mapokola ba balalu banebaile kuyotama sibangongi seo neba itongile kwa pata a motikala, taba yenetisize lipuzo zakuli, “ki kalibaka mani anebaketile kushimba ya kulubelwa kuba sibangoki mwa motikala ye kwaluhile”. Muyoyeta na ize, yomumwi kuba nebafumani likolofalo ki munyana hae, yomumwi ni yena isali wa lubasi lwahae, mi na ekelize kuli taba ye nebihilwe mazazi a kwa mulaho, kono a kuna sene siezahezi.
Kualabela kwa taba yeo, yo muhulu wa kambe ya sipokolo sa Ngoma, Inspector Shebby Lukopani, u latuzi taba yeo kakutalusa kuli Ofisi ya habo i amuhezi piho yeo la Sunda, mi kihasekungiwa muhato, mi u latuzi ka kutalusa kuli akuna taba yene sekwaluzwi. Yeo ki kalabo ye lwanisana ni kalabo ya nafile yomumwi ya sebeza mwatasi a hae la Sunda, Sergeant Mwilima, ya natalusize kuli muzeko wa taba ya kutapaulwa ni kufumbeliwa kuholofazwa i mwa lipatisiso. Lukopani u palezwi kufa buniti fa taba ya kuli mapokola batamile muakalezi ka kumufapa mihala kakukutisa mazoho a hae kwa mulaho, ni kutalusa kuli u taeza lipatisiso mwa taba yeo kubona kapa mapokola bakeshebisize musebezi wa bona, ni kuli ki kalibaka mani a bapalezwi kutama sibangongi seo sesi i kapesize machachani. Ni hakulicwalo u talelelize taba yakutokwa limota kwa kambe ya sipokola ya Luhonono, sibaka seo siinzi mabapa ni Nankuntwe. U ize basebelisize motokala ye kwaluhile kalibaka la butata bwanzila yeliba kwasibaka seo sesisa tezi sileze sa munda. Mi u felelize kakutalusa kuli bao bapunyuhile mwa kozi yeo balobalizwe kwa sipatela sesituna sa Katima Mulilo kuzwa mapokola hase babafile nzila. Bo lyaminzi ba Tembamuwe basali mwa sabo ya bupilo bwa bona ka taba yakuli sibangongi kaswana sa ba bandamena nako ifi kapa ifi