Opolisi yaNamibia oya manga po aalumentu yatano sho ya adhika nepangwe lyongushu oomilliona N$1.3 koAriamsvlei.

Omugandji gomauyelele gopolisi Elifas Kuwinga okwa ti, aafekelwa mboka yatano mwa kwatelwa Omusouth Africa gumwe oya mangelwa lwopondjila yokeshina lyokolutenda koAriamsvlei, sho kwa li taku ningwa oshikonga.

“Aalumentu mboka ya mangwa oye na omimvo dhi li pokati ko18 no40,” ta ti ngaaka.

Kuwinga okwa ti gumwe a li naalumentu mboka okwa li a fadhuka po, a shuna koSouth Africa, ashike okwa thigi po ongodhi ye yopeke osho wo uuthemba we,’’ ta hokolola ngaaka.

Otaku hokololwa kutya aalumentu mboka oya li ya adhika nomapakete omanene gaali ge na epangwe lya topolwa lwiikando 26.

Kuwinga okwa ti, epangwe ndyoka olyi na oshiviha shookilogalama 27.2.

“Otatu fekele kutya aafekelwa mboka oye na mpoka haya kutha iingangamithi, pu na natango ogendji,” ta popi ngaaka.

Aalumentu mboka otaku fekelwa ya zi nomapangwe ngoka koSouth Africa hoka kwa shuna omulumentu ngoka a matuka po sho kwa li ya kankamekwa kopolisi. 

Opolisi onkene tayi kumagidha oshigwana shi hulithe po okulongitha iingangamithi oshoka oya nika oshiponga. 

“Kehe ngoka ta ka adhika niingangamithi ota ka pewa egeelo lye lya gwana,” opolosi ya ti ngaaka. 

Otaku fekelwa aakwiilongo oyo haya yakele iingangamithi yoshilongo, nonando oye shi kutya inaga pitikwa moshilongo. 

Aanona oyendji oya thigi po oosikola , ya yi momapandaanda, omolwiingagamithi taya longitha. 

Aanyasha oya hanagulwa po kiingangamithi, neilongo kaye na nalyo, oshoka oonkalamwenyo dhawo oye dhi tula miingangamithi. 

Opolisi otayi kumagidha oshigwana shi kale aluhe tashi lopota mpoka nenge ngoka ta landitha iingangamithi. 

Tayi ti, aantu mboka inaya pumbwa okukala moshigwana oshoka otaya teyagula po aantu, oya pumbwa okukala moondjendhililo. Omumvo nguka okwa lopotwa aantu oyendji ya mangwa niingangamithi ya yooloka mwa kwatelwa aakiintu taya longele kumwe noyana.

-vkaapanda@nepc.com.na