I Kuvee Kangueehi
OTJOMUISE
Otjiuru Otjipitise tjorutu orutjevere rousemba womundu mo Namibia, o National Society for Human Rights (NSHR), Phil Ya Nangoloh, matja o President yOtjira tjo Swapo, Onongo Sam Nujoma, unozongari zoku kotoka mounane kombunda yo matoororero wounepo wondjuwo yozoveta nowo presidenta ngeri mo 2009.
Pombongarero yozombuze motjihuro ohongora Oritjatatu, Ya Nangoloh watokere Nujoma poo Otjiuru Tjehi, Hifikepunye Pohamba, veyate pehi vepatasanise oumune we imbwi. Watjere orukosi indui nambano runanwa i Pohamba. Watjere pena ovinenge vyowina mbiri orupa rorukosi oruparanga rokukuna omburuma movature nai mbapandjara ongamburiro naimba mbehazuu komapopa nani mave puratene naveyandja oruvara koruvareko rwa Nujoma.
Ya Nangoloh watjere Nujoma wahumisa ounepo wo Swapo mbwarirwa ongutukiro yehi indi pendje mena roo mari mai mbeuhara ama vemu imbura navarwe ondero porwe yawo ndjiri okurira ozoministera novena vito vyarwe vyokombanda mohoromende. O Namibia kutja ryurise ondando yaro yo 2030, marihepa ovanane mbu mavetara kumuhuka mbena ondjiviro ndjayenena ohunga nombwiko, mbena ondengero noveta yehi nawina mouyara wotjingi.
Ya Nanholoh watjere Pohamba kasere okuninikizira Nujoma kombanda yovandu va Namibia na ningire Nujoma okuheruka kopolotika kaparukaze kutja ehi riyenene okuryama komurungu. Komeho watjere ongurameno yondjesirasaneno ndjauta okutamuninwa mu Nujoma kourike we otjiwova uriri notjitjizike tjokutja aha kwekururwa. Watjere ovandu ovengi mehi varambwa movihavero vyao mena rokutja vevarwa otjovayandja voruvara koorive vomotjitamba tjopolotika mehi.”Hapo ondjesirasaneno ku imba mbeyandja oruvara kovira ovipirure iripi poo ku imba motjiwana mbehina omunda?”
Ya Nangoloh wayanisire kutja o NSHR kanaa itjayerwa oku kwekurura ndoovazu omakwekururiro inga oehepero. Wina una omwiihamwatima kutja Nujoma nounakere we kena otjina otjiwa tjemuna mo NSHR. “Ihi omena rokutja ete kawete orutu orunakere rwa karive nu matu kwekurura nu tjinene kangamwa nandarire Nujoma.”
Wina watjere Pohamba kena omasa wokuramba o NSHR mehi nandarire kutja wavanga nao. Omambo inga yapendurirwe iyomambo wo Presidenta tjiyatja ovandu mba urisiwa ohange nondikameno ngavezemo mehi.
“Presidenta Pohamba kena nandarire katiti ousemba moveta nowo Ngundeveta okuturamba mehi nandarire kutja wavanga nao. Tjaroro okutjita nao matu hungama otjombanguriro tjitjiritjo okumutjayera.”
Ya Nangoloh watjere Pohamba waungurisire eyuva rozombangane okuyandja ombuze tjingeyo yohani nozondjakaha moukoto wotjira otjinane.
“Eye porwe warondererere komarondora wetu ko ICC otjo tjtirise makuzu okukuna omburuma movandu no kuzuvisa embo re ohunga nohani nozondjakaha.”